Оқу орнын таңдау – үлкен жауапкершілік
qarmaqshy-tany.kz Бүгінде елімізде заман талабына сай, оқу-білімге барлық жағдай жасалған, әдемілігімен ерекшеленетін оқу орындары жетерлік. Соның ішінде Қызылорда қаласындағы сол жағалаудан еңсесін тіктеген «Болашақ» университеті де бар. Айта кетейік, бұл қаладағы ең биік тұңғыш 14 қабаттан тұратын ғимарат.
Заманауи білім беруге негізделген ұрпақ тәрбиесі мен білім беру ісінде өзіндік келбеті қалыптасқан Қызылорда «Болашақ» университетінің алдағы оқу жылына студенттер қатарын толықтыру мақсатында аудандар арасында пәндік олимпиада ұйымдастырып, іссапар жүргізіп келеді. Жақында Т.Көмекбаев атындағы №250 мектеп-лицейінде университеттің ақпараттық насихат тобы кәсіби бағдар беруде кездесу өткізіп, университет ректорының грантын анықтау үшін олимпиада жүргізді.
Кәсіби бағдар беру жұмыстары бойынша университеттің әлеуметтік-мәдени даму жөніндегі проректоры Гүлмира Мұратбаева, аға оқытушы, тарих ғылымдарының кандидаты Асқар Еңсепов және «Рекрутинг және мансап» орталығының жетекшісі Берік Саймағанбетов университеттің әлеуеті мен материалдықтехникалық мүмкіндіктері жайлы хабардар етті. Сонымен қатар, оқушыларды әсем ғимаратта орналасқан жастардың ордасы, аймағымыздағы ең танымал оқу орнын таңдауға шақырды.
Бірінші кезекте оқушылардан физика, биология пәндері бойынша олимпиада жұмыстары алынды. Оған аудан орталығы мен ауылдардан 200-ге жуық оқушы қатысты. Оқушылардың олимпиадаға деген ынтасы, оқуға деген құлшынысы байқалады. Екінші кезеңде мектептің АКТ залында кәсіби бағдар жөнінде түсіндірме жұмыстары жүргізіліп, оқушылармен сұрақ-жауап ретінде пікір алмасты.
– Пәндік олимпиадада үздік нәтижеге қол жеткізген оқушылар «Болашақ» университеті ректорының грантына иелік етеді. Сондай-ақ ІІ орын алған оқушыларға ақылы бөлімге оқуға түскен жағдайда 50 пайыз, ал ІІІ орын алған оқушыға 25 пайыз жеңілдік беріледі. Олимпиадаға қатысушы әрбір оқушы үлкен үміт арқалап келеді. Сол себепті оқуға ынтасы бар ауданның бітіруші түлектеріне бұл үлкен мүмкіндік. «Болашақ» университеті – Сыр өңіріне ғана емес, елімізге жоғарғы дәрежелі мамандар даярлаудағы мол тәжірибесі бар, мемлекеттік аттестаттаудан, институционалдық аккредитациядан өткен және тарихи дамуды еңсерген сапалы білім беретін жоғары оқу орны. Қызылорда қаласындағы алғашқы 1000 адамдық студенттер сарайы, бассейні мен спорт кешені, 8 жылыжайы, 2 жатақханасы бар. Жатақханада барлық жағдай жасалған әр бөлмеде жеке асханасы, жуыну бөлмесі бар. Ал жылыжайда қазіргі уақытта биологиялық зерттеу жұмысының мамандары банан, маракуйя, анар, лимонды облыстың жергілікті жеріне бейімдеп эксперимент жасау үстінде. Университет ғалымдары мектеп оқушыларымен де түрлі кездесу ұйымдастырып, қызығушылығы бар балаларға жылыжай жұмыстарын түсіндіреді. Сонымен қатар университет құрылтайшысы Бақберген Досмамбетовтің бастауымен көгалдандыру ісі де жолға қойылған, – дейді университет оқытушысы Асқар Еңсепов.
Жоғары оқу орнында білім алу қолжетімді. Белсенді студенттерді қолдау да бар. Спорт, өнер, қоғамдық жұмысқа белсенді қатысатын студенттерге оқу ақысының жеңілдігі мен ректор гранты қарастырылған. Көп жас Астана, Алматы шаһарына барып оқығысы келеді. Таңдауға талас жоқ. Дей тұра өз өңірімізде де алып шаһардан кем емес оқу орындары баршылық. Оның ішінде аймақ имиджі мен қалаға көрік беріп тұрған «Болашақ» университетінің орны бөлек.
– Бізде «грантқа түссе болды» деген ұғым бар. Дей тұра І семестр біткен соң оқудан шығып келетін біршама студенттерді көріп жатамыз. Тегін оқуға түсе тұра, қайта келіп, біздің университетке ақылы бөлімде оқуға түсетіндер бар. Сол үшін баланың көңілі қаламаған мамандыққа қыстап түсірудің қажеті жоқ. «Мамандық таңдаудан қателеспеу керек» деп жиі айтамыз. Болашақ өмірің, жұмысың мамандықпен байланысты болған соң, әуелде шалыс баспаудың қарекетін қылуы маңызды, – дейді А.Әлиұлы.
Ақнұр САҒЫНТАЙ
