Қазақстан БҰҰ-ның 100 жылдығына орай бірлескен жоспар әзірледі

Біріккен Ұлттар Ұйымы Қауіпсіздік кеңесінде бітімгерлік миссиясының міндеттері талқыланды.
Оған ұйымның осы мақсаттағы әскерінің қолбасшылары қатысты. Айтуларынша, бүгінде лаңкестік топтардың көбісі заманауи қарулармен жасақталған. Сондықтан оларға қарсы тұру оңай емес. Қауіпсіздік кеңесіндегі бұл жиынға Польша төрағалық етті. Кеңеске мүше мемлекеттер қауіпті аймақтарға жіберілетін жауынгерлердің дайындығы мен қаруландыру мәселесіне баса мән берді. Халықаралық ұйым мәліметтеріне қарағанда, бүгінде Біріккен Ұлттар Ұйымының 16 миссиясында әлемнің 122 мемлекетінен 100 мыңнан астам жауынгер қызмет атқарады.
Қанат Тұмыш, Қазақстанның БҰҰ жанындағы тұрақты өкілінің орынбасары:
– Еліміз Біріккен Ұлттар Ұйымының 100 жылдығына орай, яғни 2045 жылға дейін қарулы қақтығыстардың барлығын тоқтатуға бағытталған бірлескен жоспар әзірледі. Біздің бітімгерлеріміздің маңызы зор. Қақтығыстарды қарулы күшпен емес, саяси жолмен шешуге ықпал етуіміз керек. Соғысушы тараптармен жеке-жеке сөйлесіп, ортақ мәмілеге келуге тиіспіз.