Әрбір пікір маңызды
qarmaqshy-tany.kz Бүгінде облыс бойынша 32 мыңға жуық мүгедектігі бар адам тіркелген екен. Бұл халық санының 3,8%-ін құрап отыр. Олардың ішінде 26 мыңы ересектер, қалған 6 мыңы 18 жасқа дейінгі балалар. Мүгедек жандардың мүддесі қандай? Бұл туралы нендей жобалар бар, олар қалай жүзеге асады? Осы сұрақтардың төңірегінде сәрсенбіде аудандық Жыраулар үйінде кездесу өтті. Онда мүмкіндігі шектеулі жандардың ұсыныс-тілектері тыңдалды. Жиынға аудан әкімінің орынбасары Жұлдызхан Байназарұлы төрағалық етті.
Кездесуге облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары А.Ибраева, денсаулық сақтау басқармасы басшысының орынбасары Ж.Шайымбетов, облыс бойынша еңбек және халықты әлеуметік қорғау департаменті басшысының орынбасары Т.Мырзахметова, облыстық мүгедектер қоғамының төрағасы С.Сиюов пен аудан тұрғындары қатысты.
Кездесу барысында мүмкіндігі шектеулі жандар тарапынан тиісті сала басшыларына сұрақтары қойылып, оған тұщымды жауаптар берілді. Тұрғындардың тілегі бойынша «Инватакси» қызмет көлігінің санының көбеюіне, тегін дәрі-дәрмектердің болуы, мүгедектікке шығаруға қатысты ұсыныс-пікірлерін жеткізді.
А.ЕРДҮЙСЕНҚЫЗЫ
