Оқушылар тегін ыстық тамақпен қамтылды

Бүгінде аудан бойынша 1-4 сыныпта оқитын 6398 оқушыға ыстық тамақ берілуде. Сонымен қатар, әлеуметтік көмек қажет ететін отбасыларынан шыққан 1952 баланы қосқанда жалпы 8350 оқушы мемлекет тарапынан қаржыландырылып, бір мезгіл ыстық тамақпен қамтылып отыр.

Тағам рационы Қазақ тағамтану академиясының Ұлттық салауатты тағамтану орталығы ұсынған «Мектеп оқушыларының тағам рационы бойынша бірыңғай стандарттар» әдістемелік ұсынымдарына сәйкес перспективалық маусымдық төрт апталық мәзір жасалып, салауатты тағамдар дайындалып берілуде. Мәзірді әзірлеу кезінде білім алушылар мен тәрбиеленушілердің мектептегі уақыты, жас ерекшелігі ескеріліп, витаминдік-минералдық кешенмен байытылған тамақ өнімдері көзделген.

Мектеп аспазшылары бұрығысынша тендер арқылы анықталады. Әр мектептегі қамқоршылық кеңес, ата-аналар комитеті, мектеп әкімшілігі мен медицина қызметкерлерінің қатысуымен тамақтану сапасын мониторингілеу бойынша комиссиялар құрылған.

Оқушылар мен ата-аналар бұл жаңалықты естіп қуануда. Ата-аналар балаларының тамағы тоқ болса, сабақ үлгерімінің де жақсы болатынын алға тартады.

– Бүгін No275 орта мектепте оқитын қызым асханадан тегін ыстық тамақ берілгенін айтып мәз боп келді. "Балаға қамқорлық – ел ертеңіне қамқорлық" демекші, балалардың өмірін жақсартып, лайықты және табысты болашаққа қол жеткізуге мүмкіндік беру мақсатында осы бір қамқорлықтың жүзеге асқаны аса қуантады. Өз кезегінде балалар да жасалған жақсылықты жауапсыз қалдырмайтынына сенімдімін. Бесігінде бес түлейтін балдырған – ертең ел туын желбіретер ер болады. Сол себепті ел ертеңіне қамқор болайық, – дейді ата-ана Аяжан Серікова.