Ұрпаққа бұйырған бақыт

qarmaqshy-tany.kz 25 қазан - Республика күні Қазақстанның мұқым халқының достығы, қол жеткен табысы, ұлттық стратегиялық мүддесі мен патриоттық сезімі паш етілетін күн.

1990 жылы осы күні Қазақстан Республикасының егемендігі туралы декларация қабылданып, ол мемлекеттік билік тармақтарын бөлуді жария еткен бірінші құқықтық құжат болды. Әлемдік тәжірибеде мемлекетті басқару республикалық, яғни президенттік, парламенттік немесе аралас басқару деп бөлінетінін ескерсек, елімізде президенттік басқару нысанының таңдап алынғаны тегіннен-тегін болмаса керек.

Биыл президент пәрменімен Республика күні ұлттық мерекелер қатарына еніп, халық болып тойлағалы отырмыз.

Біздің академик С.Жиенқұлов атындағы Байқоңыр жоғары колледжі ұжымы да атаулы күнге өз үлесін қосуда. Атап айтар болсақ, колледждің бір топ студенттері мерекеге орай өткізілген «Қыран елім – Қазақстан» жобасы аясында флешмобқа қатысып, белсенділік танытты. «Жастар ресурстық орталығы» Байқоңыр қалалық бөлімінің ұйымдастыруымен өткен іс-шараға студенттерімізбен қатар, қаладағы әртүрлі мамандық иелері: полиция қызметкерлері, ХҚК орталығы мамандары, мұғалімдер, медицина қызметкерлері және мектеп оқушылары қатысты.

Жоба аясындағы челенджді Байқоңыр жастары Түркістан облысы жастарынан қабылдап алып, елордамыз Астана қаласының жастарына жолдады. Сонымен қатар жоба барысында мәнерлеп оқу сайысында да колледж студенттері өздері жаттаған өлеңдерін мәнерлеп оқып, әлеуметтік желілерге жолдауда.

Ата-бабамыз ғасырлар бойы армандап өткен тәуелсіз ел болу мәртебесін көру – бүгінгі ұрпаққа бұйырған зор бақыт. Осы қуанышымыз құтты, бақытымыз баянды болсын. Жаңа ғасырда қайта түлеген, жасарып түрленген еліміздің тәуелсіздігі тұғырлы болғай!

Рауа ТҰРМАХАНОВА,
Байқоңыр жоғары колледжі директорының орынбасары

Қоғам

24 қазан 2022 ж. 451 0