Отбасының электрондық картасы жасалады
Елімізде әрбір отбасының құрамы мен әл-ауқат деңгейіне қарай мемлекеттік кепілдік түрлерін алу құқығын қамтитын цифрлық карта жасалмақ. Бұл туралы Еңбек және халықты әлеуметтік қорғау министрлігі хабарлады.
Отбасының цифрлық картасы – мемлекеттік кепілдіктер бойынша дербестендірілген отбасының базасы. Отбасының цифрлық картасын енгізу мемлекет тағайындаған жәрдемақыларды проактивті форматта, яғни төлем алушының өтінішін күтпей беруді көздейді.
Мәселен, бір жасқа толмаған баласы бар отбасы бала тууы бойынша берілетін жәрдемақы алуға құқылы. Кәмелет жасқа толмаған төрт және одан да көп баласы бар отбасы бала 18-ге толғанша ай сайын жәрдемақы алады. Мүгедек бала тәрбиелеп отырған отбасы мүгедектік бойынша берілетін жәрдемақы ала алады. Осындай мысалдар өте көп.
«Отбасының цифрлық картасының жұмыс алгоритмі келесі тәсілмен жүзеге асырылады – мемлекеттік кепілдік алуға құқығы бар отбасына Еңбек министрлігінен SMS-хабарлама жолданады. Онда азаматтың мемлекеттік кепілдік алуы мүмкін екені жазылған. Бұдан бөлек, SMS-хабарламада азаматқа мемлекеттік кепілдікті проактивті форматта тағайындауға келісу немесе келіспеу құқығы беріледі. Егер азамат келіскен жағдайда, онда оған жәрдемақы тағайындалады. Ол кейін төлем алушының шотына түседі», делінген министр-
лік хабарламасында.
Осы мәселе бойынша өткен жиналыс барысында орталық мемлекеттік органдардың, жергілікті атқарушы органдардың және «Азаматтарға арналған үкімет» КеАҚ Отбасының цифрлық картасын іске қосуға дайындығы тыңдалды. Жиналыс қорытындысы бойынша 1 қыркүйектен бастап Отбасының цифрлық картасын жекелеген мемлекеттік кепілдік түрлері бойынша қанатқақты жоба түрінде жүзеге асыру туралы шешім қабылданды.
