Табиғат аясында кітап оқы

Қазір жаз мезгілі. Оқушылар кезекті жазғы демалыста. Осы ретте кітапханашылар кішкентайларды кітап оқуға қызықтыру, әрі олардың бос уақытын тиімді пайдалануға үйрету үшін түрлі іс-шаралар ұйымдастыруда. Осындай бір өзгеше іс-шара ІІІ Интернационал ауылында өткізілді.

Ауыл кітапханашысы Рима Тұрманова ашық аспан астында балалармен бірге кітап оқып, оларды талдауға арналған «Біз кітаппен біргеміз» тақырыбында кітап оқу әдеби отырысын өткізді.

– Бұл іс-шараның көздегені – балалардың кітапқа деген қызығушылығын арттыру. Кітапты тек кітапханада, үйде, мектепте ғана емес, табиғат аясында да оқуға болатынын көрсеттім. Балаларға кітапты ашық аспан астында, сусын ішіп, еркін отырып оқимыз десе кітапханаға қуана келеді. Кішкентай оқырмандарымды өлең де оқытып, шағын әңгімелермен таныстырып, арасында доппен де ойнатып аламын. Менің басты мақсатым – осындай ерекшелікті қоса отырып, оқырман санын арттыру. Ойы озық, көкірегі ояу ел болашағының өсуіне өз үлесімді қосу, – дейді кітапханашы Рима Тұрманова.

Иә, аспан астында кітап оқу – жазғы демалыстағы балалар үшін керемет мүмкіндік. Жаңа білімді де игеріп, ойнап та, достармен бірге таза ауа жұтып та үлгеруге болады. Бұл уақытта телефоннан да демалады. Сондай-ақ бос уақытын қызықты әрі пайдалы өткізуіне, көзқарасының дамуына ықпал етеді. Ал кітап оқу – балалардың өз ойын еркін жеткізуге, тіл байлығын арттыруға, табиғатты қорғауға, оны аялауға, саламатты өмір салтын ұстануға тәрбиелейді.

Ардақ СҮЛЕЙМЕНОВА