Аудан басшысы Жосалы кентін аралады

Аудан әкімі Әділбек Бөрібайұлы Жосалы кентінде жүзеге асатын жобалар мен кентішілік жолдардың жағдайымен танысты.

Алдымен Жосалы кенті кіреберісіндегі «Қазақ хандығы» аллеясын көгалдандыру, тал егу жобасын бақылап, Сырдария өзенінен Сарыөзек көліне насос арқылы аяқ су апару жобасымен танысты. Аталмыш жобаны іске асыру арқылы кентте мал жайылымдық жерлерін арттыру жұмыстары жоспарланып отыр.

Сонымен қатар, аудан әкімі денешынықтыру-сауықтыру кешенінің құрылыс жұмыстарының барысын қадағалап, Тайшық би көшесін абаттандыру, Ү.Томанов көшесінде орналасқан «Шығыс» каналын темірбетон лотокпен қаптау жобаларымен қатар Жамбыл Жабаев, Мәншүк Мәметова және Жангелдин көшелерінің жәй-күйімен танысты.

Биылғы жылы Тайшық би көшесіне тас араласқан құм төсеу, жаяу жүргінші жолын салу, асфальт төсеу жұмыстары жүргізіліп, кіші архитектуралық формалар орнатылып, адам жанына рухани дем беретін идеологиялық маңызы зор «Сыр сүлейлері» аллеясы ашылатын болады.