Сүлейлер салған сара жол

Ұрпағына кең байтақ жазира даласымен қоса, оны сазды әуенімен мәңгілік тербетіп жатар рухани байлығы - дәстүрлі жыраулық өнерін, ән менен жырын аманат еткен ата- бабаларымыз рухына қалай және қандай құрмет жасасақ та артық емес.

Осы орайда ұлттық мәдениетімізді дамытып, насихаттау және жас ұрпаққа ұлттық өнеріміз бен Ұлы тұлғаларымызды дәріптеу мақсатында Сәрсенбай Бөртебайұлы атындағы Ақжар ауылдық клуб үйінде "Рүстембек жырау" үйірмесінің жетекшісі Балтабай Бедебаевтың ұйымдастыруымен Сыр сүлейі Сәрсенбай Бөртебайұлының мұрагері ұрпағы Алшынбек Сәрсенбаевтың туғанына 80 жыл толуына орай "Сүлейлер салған сара жол..." атты танымдық кеш өткізілді. Кешке Алшынбек жыраудың бел баласы аудандық Т.Салқынбайұлы атындағы әуез мектебінің ұстазы, жырау Амантай Сәрсенбаев арнайы қатысты. Жас шәкірттер жырдан шашу шашып, кеш ажарын аша түсті.

Біздің мақсатымыз - жастарымыздың Ұлы тұлғаларды еске түсіріп, ұлттық дәстүрлі жыраулық өнерімізді есте сақтауы, бойына сіңіруі - елдігіміздің белгісі.