№42 Алматы-Атырау пойызы Қармақшыға тіреле тоқтады. Самарқау күйге түскен жолаушылар енді ғана улап-шулағандай «не болды?» десті. Бәрінде бар бір «үһ». Ол себепсіз де емес. «Қасіретті қаңтар» атауымен елдің есінде қалар оқиғаның орын алар тұсы. Аһ ұрған көпшіліктің ойы дөп түсіп, по йыз ауданда 00.28-ге дейін аялдап қалды. 8 сағат уақыт. Интернет жоқ, байланыс әлсіз. Осы уақыт аралығында жерлестер үнсіз қалмады. 645 жолаушыға Жосалы Теміржол станциясының қызметкерлері 2 қазан ыстық тамақ пісіріп таратады. Ал аудан әкімдігінің ұйымдастыруымен тамақ, нан, су жеткізіледі. Сағат тілі 20.00-ге қараған уақытта ауданның еріктілері мен жастары, мешіт жамағаты, кәсіпкерлердің қолдауымен қазан-қазан палау басып, шай қайнатып, пойыздағы балаларға сүттерін, бір реттік жаялықтарын, су, нандарын жеткізіп тұрады. Жаяу жүрген жігіттер тамақ тасыса, көлігі барлар Сексеуіл, Арал, Қазалы тұр ғындарын жолай өтіп бара жатқан көліктерге мінгізіп, тегін тасымалдайды. Ел басына күн туғанда сауапты істен құр қалмаған жерлестерге жолаушылар да алғаусыз алғысын айтты. Олар осы бір ғана іспен күштің бірлікте екенін тағы бір мәрте дәлелдей алды.