Жыл сайын мұғалімнің мәртебесі көтеріліп, қоғамдағы орны айшықталып келеді. Бұл біздің мерейімізді үстем етуде. Мемлекет басшысы бүгінгі жолдауында да мұғалімдерді қолдау жалғаса беретінін алға тартты. Ол өз сөзінде «Биылғы жылдың қаңтар айынан бастап педагогтардың жалақысы 25%-ға өсті. Келесі 3 жылда осы мақсатқа 1,2 трлн теңге бөлінеді. Қабылданған шаралар өз нәтижесін көрсетіп жатыр. Атап айтқанда, педагогикалық мамандыққа түсетіндердің орташа балы көбейді. Мұғалімдерді қолдау саясатын жалғастыра береміз» деп атап өтті.

Қай кезде де білім саласына басымдық беру – ел болашағы жолындағы нақты, әрі қажетті қадам. Бұл жолдау елдің болашағын тәрбиелеп отырған ұстаз қауымына жаңа оқу жылын тың серпінмен, жақсы жаңалықпен бастауына себеп болуда. Мемлекет тарапынан қолдау көбейген сайын жұмыс жүйелі жүргізіліп, сапаға басымдық беріледі. Берілер білімнің сапалы болғаны ел үшін тиімді болмақ. Ұрпақ тәрбиелеп отырған мұғалімдер Мемлекет басшысының сенімінен шығып, келешектің кемел тұлғаларын дайындауда аянбай тер төгері анық.