Жылқышылар тасаттық берді

Даланың мұндай күйге ұшырауына табиғаттың тосын жағдайы себеп. Биыл қыстың суығы қатты болғаны мен жауған қардың мөлшері аз болғаны белгілі. Оның үстіне көктемде жауын болмағандықтан, көк шықпай жатып күннің ыстығынан қурап қалды. Шөп орнына тұз шығып, сорға айналған далада мал азық таппай, әр жерде теңкиіп жатыр.

Қазақта «Жұт жеті ағайынды» деген тәмсіл бар. Осы ұғымның жалғасы ретінде «Жұт жетеу, содырмен сегіз, салақпен тоғыз, олақпен он» деп мақалдайды.  Халық осы арқылы табиғат апатының зардабы адамның өзіне байланысты екенін аңғарып отырған. Елге төнген қуаңшылық ауданның малшыларынан да айналып өтпеді. Осыған орай ауданның солтүстік-шығыс беттегі жылқышы азаматтары Бағдат Елпанов, Шерхан Оспанов, Тасболат Түркешов, Бостан Жалғасбаев, Айдос Ақылбеков, Мақсат Басшыбаев, Бағдат Оспановтың ұйымдастыруымен және осы іске тікелей атсалысқан Серікжан, Жасұлан, Алтай, Кәтіби, Нұржан, Жандос есімді жігіттердің қызмет істеуімен кентке тасаттық берілді. Алдымен тасаттықтан бір күн бұрын кенттің шығыс бетінде орналасқан «Қараөзек» каналының жағасында аудандағы «Қармақшы ата» мешітінің бас имамы Жақсыбек қажы Әбиұлы жамағатпен бірге Жаратқанға жалбарыну арқылы құлшылық жасап, намаз оқыды. Одан соң құрбандыққа мал шалынып, артынан Қатым Құран жасалды. Кешкі ақшам намазында жамағатқа уағыз насихат айтылып, зекет жөнінде мәлімет берілді.

Құдайдың құдіретінде шек бар ма? Тәңірдің тілегі қабыл болғандай тасаттық берілетін күннің таңында күн күркіреп жауын жауды. Салқын жел соғып, күннің бетін қара бұлт көлеңкеледі. Қаз-қатар тігілген шатыр астында кент тұрғындарына үлкен ас берілді. Тасаттыққа келгендерде шек болмады. Жиналған жамағатқа уағыз айтылып, алдағы келе жатқан Құрбан айт мерекесі насихатталды. Ақсақалдар ұйымдастырушыларға ақ батасын беріп, артынан Құран оқылды. Жұмабек Қабылов 100 литр қымызынан дәм ұсынса, Дастан Даңылбаев 100 литр шұбатын халыққа таратты. Сонымен қатар ұйымдастырушы жігіттердің демеушілігімен жиналған қаражатқа жеті отбасыға азық-түлік таратылып, қайырымдылық жасалды.