«PING PONG» үйі ашылды

Ауданда үстел теннисі орталығы ашылды. Тұсауы кесілгеніне көп болмаса да келушілердің сүйікті орнына айналып үлгерді. Енді заманауи талапқа сай орталықта балғындар да, жас­тар мен тұрғындар да жыл он екі ай бойы теннис спортымен шұғылдану мүмкіндігіне ие болмақ.

Бұл кәсіпті қолға алған – Нұрасыл Бекматов пен Талапбек Төлепбергенов. Талапты жастар ойлана келе өз қара­жатымен кәсіп ашуды ниет етіпті. Олар теннис орталығы жас­тарды спортқа ынталандыруға, олардың уақытын бос өткізбеуге, аудан тұрғындарының спортқа деген құлшынысын арттыруға, түптеп келгенде, саламатты қоғам қалыптастыруға үлкен серпін беретінін айтады.

– «Қалауын тапса қар жанады». Кәсіп бастап, тұрғындарға қызмет етуге білек-сыбана кірістік. Қаражат жинап, қалаға барып теннистің 3 үстелін әкелдік. Екі қабатты үйдің үстін жалға алдық. Қазір міне, 3 бөлмені теннис ойнауға ыңғайлы етіп жабдықтадық. Алдағы уақытта заманға сай, жастар қызығатындай етіп бөлме қабырғаларын түрлі-түсті принттармен бояп, сәндемекпіз. Ашылғанына көп болмаса да келушілер бар. Кешкі 19.00-ден бастап ашық. Сағатына 500 теңге. Жылыту батареялары жақсы қыздыратын болған соң орталық қыс мезгілінде де жұмысын тоқтатпайды, – дейді Нұрасыл.

Карантиндік талаптарды сақтай отырып, өз жұмысына кіріскен «Рing pong» үйіне қызығушылықпен күнде келетіндер бар. Олар уақытын осында өткізіп, достарымен үстел теннисінде бақ сынасады.

– Жұмыстан келіп, шар­ша­ға­ны­мызды осында басамыз. Денеміздің барлығы қозғалып, бойдағы қажет емес дүниені ойын арқылы шығарамыз. Бұл тұрғындар үшін де, жастар үшін де жақсы мекенге айналуда, – дейді аудан тұрғыны Сәтбай Сыдықов.

Алға қойған мақсаты айқын талапты жастар алдағы уақытта кәсібінің көкжиегін кеңейтпек. Ал уақытын спортпен өткізгісі келетіндерге ор­талықта орналасқан «Рing pong» үйінің есігі әрдайым ашық.