Сыбайлас жемқорлық –  Қазақстанның қазіргі күрделі мәселесі. Ал онымен күресу үшін қам-қарекет ету қажет. Әсілінде бұл дерт әлемдегі барлық елдердің қай-қайсысын да қатты алаңдататыны анық.

Қазекем сол заматта дөп басып «Тура биде туған жоқ, туғанды биде иман жоқ» деген еді. Олардың әділдік пен турашылдықты ту еткенін Төле би, Қазыбек би, Әйтеке би және тағы да басқа біртуар билер мен шешендердің өмірі дәлел болатынын біз тарихтан жақсы білеміз.

Қазақстан Республикасының заңнамаларына сәйкес, сыбайлас жемқорлық қылмыстарға негізінен лауазымды қылмыстар жатады. Өмір көрсеткендей, қызмет өкілеттігін теріс пайдалану, билікті не қызметтік өкілеттікті асыра пайдалану, пара алу, пара беру, парақорлыққа делдал болу, қызметтік жалғандық жасау, көрінеу жалған сөз жеткізу, сеніп тапсырылған бөтен мүлікті иеленіп алу немесе ысырап ету, көрінеу жалған жауап беру, сарапшының жалған қорытындысы немесе қате аудару, жалған жауап беруге немесе жауап беруден жалтаруға, жалған қорытынды беруге не қате аударуға сатып алу, лауазымды адамдардың сот үкімін, сот шешімін немесе өзге де сот актісін орындамау, осындай қылмыстардың барлығы жемқорлық сыбайластық байланыстарды пайдалану арқылы жасалады.

Күреспейді емес, күреседі-ақ. Қоғамның барлық күш-жігерін біріктіріп, осы дерттің одан әрі ушықпауы үшін оны тоқтатудың барлық амалын қолдану арқылы ғана бұл құбылысқа тиімді түрде қарсы тұруға болады. Дертке қарсы неге қарекет керек? Себебі біздің қоғамда сыбайлас жемқорлыққа орын жоқ.