1 наурыз – Алғыс айту күні. Бұл – қысылтаяң шақта бар ауыртпалықты бірге көтеріп, Елбасының бастамасымен Тәуелсіз Қазақстан құру жолында аянбай тер төккен ел азаматтарының бір-біріне құрмет көрсету күні. Мерекеде Қазақстандағы өзге этнос өкілдері қиын-қыстау шақта құшақ жая қарсы алған дархан көңіл қазақ халқына алғыс айтады. 2016 жылдың 14 қаңтарында Мемлекет басшысы Нұрсұлтан Назарбаев Қазақстан халқы Ассамблеясының құрылған күнін Алғыс айту күні деп жариялаған болатын. Тарихқа көз салсақ, XX ғасырдың басында елге Беларусь, Ресей және Украинадан 1 миллионнан аса адам қоныс аударған, ұжымдастыру кезеңінде 250 мың шаруа жер аударды. Бүгінде қазақ жеріне 100-ден аса ұлт өкілі ауызбірлікте, тату-тәтті ғұмыр кешіп жатыр.

Кешегі қилы заманда қазақ халқы тағдырдың жазуымен елге келген қаншама ұлт пен ұлыс өкіліне кең құшағын жайып, бауырына тартты, бір үзім нанымен, барымен бөлісті. Киелі Қармақшы жерінде осындай ынтымағы жарасқан, сан ұлт ұйысқан мекен – ІІІ Интернационал ауылы бар. Көп ұлт шоғырланған бұл жерде кәсіпкер де, еңбеккер де, балаға білім нәрін сусындатқан ұстаз да, арманымен қанат қаққан жас мамандар да жетерлік. Мереке қарсаңында бірлігі бекем, татулығы мығым мекенге ат басын бұрдық.