Пиротехникалық өнімдер бақылауға алынды
Қазақстан Республикасы Ішкі істер министрінің 2020 жылғы 12 желтоқсандағы нұсқауына сәйкес, жаңа жыл мерекесін өткізу кезеңінде қоғамдық қауіпсіздікті қамтамасыз ету, сондай-ақ жеке және заңды тұлғалардың азаматтық пиротехникалық заттар мен оларды қолданып жасалған бұйымдар айналымының белгіленген қағидаларын сақтау, бақылау мақсатында үстіміздегі жылдың 15 желтоқсаны мен 2021 жылдың 7 қаңтар аралығында «Пиротехника» жедел-профилактикалық іс-шарасы өткізілуде. Бүгінде тез жанғыш материалдар мен пиротехникалық заттар сататын сауда орындары тексерілуде.
Қармақшылық инспекторлар, әсіресе, апат орын алған жағдайда эвакуациялық шығу жолдарының болуына, дабыл қондырғыларының орнатылғанына, электр желілерінің жарамдылығына, өрт сөндіргіш құралдардың болуына назар аударуда.
Жаңажыл мейрамы отшашусыз өтпейтінін ескеріп пиротехникалық өнімдердің пайдасынан зияны көп екенін және пиротехникалық бұйымдарды сатып алу, сақтау, тасымалдау, әкелу, әкету қағидаларын, сондай-ақ кәмелетке толмағандарға сатуға тыйым салуды түсіндіру мақсатында кенттегі сауда орындарында жергілікті полиция қызметі бөлімшесі, төтенше жағдайлар бөлімі және еріктілердің қатысуымен рейдтік іс-шаралар жүргізілуде.
Негізінде пиротехникалық заттарды мемлекеттік лицензиясы бар мекемелер ғана сата алады. Оның басқа орындарда сатылуы заңға қайшы.
