Адал қызмет алғысқа бөлейді
Ауылдан әрірек орналасқан көлікжай ішінде шаңқ-шұңқ, тарс-тұрс дыбыстардан құлақ тұнады. Станоктардың гүжілдеген дауысынан мұнда біреудің айтқанын екінші біреу есту қиын. Бос жүрген де ешкім жоқ. Бәрі өз ісімен әуре. Қаз-қатар тізілген техникалардың сірә, көбісі жаңа. Бірер жарымының ақауы жөнделіп, тізгіндейтін жүргізушіні күтіп тұрғандай.
Аудандық мәслихат депутаты, белгілі меценат Нұржан Пірмантаев басшылық ететін "Тұрмағамбет" деп аталатын бұл алып серіктестікте сан алуан маман бар. Олардың барлығы өз ісінің нағыз шеберлері. Ал, зейнеттік демалысқа шықса да қызметтен қол үзбеген Аманкелді Мүсілімов жастарға үлгі. Аталған шаруашылықта 1968 жылдан бері жұмыс істейтін еңбекке епті жан алғашқы қызметті көлік жүргізуден бастапты. Біраз жыл әкесінің ізін жалғап, ірі қара бағумен айналысқан. Бригадир, жер тегістейтін отрядтың жетекшісі, май базасында қоймашы сынды жауапты жұмыстарды тыңғылықты тындырған маманның көмегіне жүгінбейтіндер кемде-кем. Қолынан келмейтіні жоқ бесаспап азаматқа күріш егу де, көлік жөндеу де таңсық емес. Отбасында зайыбы Бөбек Төлеуовамен 5 бала өсіріп, олардың қызық-қуанышына кенелген жайы бар. Бөбек анамыз өз кезеңінің сүт бұлағын селдеткен сауыншысы. Ес білгелі туған жерінде қалтқысыз қызмет еткен олар ұрпағының да ауыл үшін айтулы іс атқарғанын қалайды.– Зейнетке шықсақ та Шәку, Нұралбек деген үш замандас әлі күнге жұмыс істейміз. Басшының бізді жұмыстан біржола қол үзуге мүмкіндік бермей жүруінің де сыры бар. «Болдық, толдық» деп үйде отырмай, шамамыз жетсе жастарға ақылшы болып, жанында жүргенімізді жөн көреді. Жасымыздан шаруашылықта жұмыс талғамай, бәрін істедік. Одан жаман болғанымыз жоқ. Ардагер ретінде ауылда өтетін жиын, кеңестерден де шет қалмаймыз. Пікірімізді айтып, ойымызды ортаға саламыз. Бәріміздің илегеніміз бір терінің пұшпағы ғой. Ауылдың алға өрлегенінен басқа не керек? – дейді Аманкелді Қоңыршаұлы.
Иә, серіктестік басшылығы еңбек адамдарына лайықты жағдай жасай біледі. Оны әр жылдары берекелі күзде ұйымдастыратын сабантойда аңғарып жүрміз. Талаптанған әрбірінің жемісті еңбек етуіне мүмкіндік бар. Техниканың, адамдардың үзіліссіз жұмыс істеуі соның дәлелі. "Нан болса – ән болады" деп халқымыз бекер айтпаған. Байлық пен береке нанда! Оның қадірін дән өсіріп, оны жинаушылар жақсы біледі. «Тұрмағамбет» ЖШС үшін өткен жыл жемісті болды. Диқандар мерейі үстем шықты. Бұл – Алланың бергенін адамның іске асыра білуінің, мемлекет қолдауының нәтижесімен қатар, Аманкелді аға секілді еңбек адамдарының маңдай тері.
Гүлжанат ӘМІРҚЫЗЫ
