Газеттің өткен санында елге қажетті дәрілер апта ішінде келеді деп жазған едік. Уәде еткендей бүгінде кенттегі дәріханаларға дәрілер жеткізілуде. Толық 100 процент әкелінді демесек те дәрілер келді. Аспирин, цефазолин, цефтриаксон, метрид секілді антибиотик дәрілер молынан түсіп жатыр. Алайда дертіне дауа іздеген жұртшылықтың сұранысындағы парацетамол, анальгин, цитрамон препараттары әлі келген жоқ.

Осы сауалдың түйінін шешу үшін өңірдегі барша дәріхананың қызметкерлері, сала басшылары және аудан әкімі кент орталығындағы мәдениет үйінде жолықты. «Таразы басына келелі мәселе түсіп тұр. Елдегі дәрі тапшылығын баршаңыз білесіздер. Бүгінгі таңда дәрінің жеткізілу жағы қалай, бағаны көтеру орын алып жатқан жоқ па? Шешімді жолы қайсы?» деп сөз бастаған өңір басшысы Мұса Қалдарбеков өтімді сауалын ортаға тастады.

Рас, қазіргі таңда ел-жұрт дәріге қол жеткізе алмай жүргенде бағаны көтеру басты қателік. Онсыз да емхана мен дәріхана ортасын тоздырған халықтың шыдамы да шегіне жетті. Ауруханада жатар орын болмағасын үйінде жатып ем алудан басқа амалы қалмады. Қызуды түсіретін дәрі таба алмай дәріхана жағалаған көпшілік келер дәріден үмітті.

Кездесуде сөз алған жеке кәсіпкер Балымша Хамидова дәрі бағасы кентте тұрақты екенін айтып, ел-жұртты сабырға шақырды.

– Қазір дәрі бағасын қымбаттатып, оны көтермелеп сатуға негіз жоқ. Екіншіден, елдің дәріханалардағы бағамды салыстырып қымбат деп жүргені мынада. Мәселен, кез келген дәріні алсақ ол бір фирмадан емес, әр түрлі елден келеді. Сол үшін оның бағасы да түрленеді. Мәселе осында. Соны халық түсінсе деймін. Ал негізсіз баға көтеру болған жоқ, бекітілген мөлшердегіден түсіріп сатпасақ артық көтермейміз, – дейді ол.

Ал қордағы дәрінің жағдайын жеткізген №28 «Шапағат» дәріханасының иесі Серғали Ешниязов әуелгі уақытта бір жылға жететін парацетамол, анальгин секілді дәрінің бір күнде өтіп кеткенін айтты. Тұрғындар шамадан тыс сатып алған. Бүгінде аспириннің 3 мың данасы қорға келіп жетті. Одан бөлек, қажетті дәрі-дәрмектер де бар. Иә, қазір дәріханаға барсаңыз дәрігердің рецептісін сұрайды. Себебі шамадан тыс дәрі сатып алуға болмайды.

Кәсіпкерлердің сөзінен кейін жиынды қорытындылаған аудан әкімі М.Қалдарбеков алдағы уақытта дәрілерді адам басына 5-еуден шектеп сату керегін айтты. Оған қоса сала басшыларына дәрі-дәрмек тапшылығын жою мен баға көтеру жағын қадағалауды тапсырды.