Алтынша Кенжеева: "Құптарлық қадам"

Қазіргі еліміздегі ахуалға байланысты ақпарат құралдарынан көптеген мәлімет алып отырамыз. Бұл үйреншікті дүниеге айналды. Өйткені қоғамда белең алған індеттің алдын алу мен онымен пәрменді күресте үлес қосу – тек құзырлы орын өкілдері ғана емес, еліне жаны ашып, туған жерін қастерлейтін әрбір қазақстандықтың парасатты борышы болмақ.
Осындай себеппен басылым сайтынан Қызылорда облысының Бас мемлекеттік санитариялық дәрігерінің №10 қаулысына көзім түсті. Аймақ халқы үшін маңызды саналатын аталған құжатқа тағы да біршама өзгерістер енгізіліп, карантин шараларын күшейту туралы шешім қабылданыпты.
Бұл өте құптарлық қадам. Көзге көрінбейтін кеселдің елімізде әлі күші қайтып, беті бері қараған жоқ. Сол себептен де мұндай күшейтілген шараның облыс тұрғындарына тек қана пайдасы тимек. Соның ішінде құлаққа естірге оғаштау көрінгенімен коронавирус инфекциясын жұқтырған 5 науқас тіркелген жағдайда ауылдық елді мекеннің қоршалатыны айтылған. Бұған толық қосылуға болады. Аса қауіпті инфекция «әккі, қу түлкі» тәрізді. Көзге көрінбей-ақ өз шаруасын тындырып, жолына кезіккенді аямай сұлатып түсіреді. Вирус жұқтырған 1 адамның жүздеген, тіпті мыңдаған адамға зияны тиіп жатқаны аз айтылып жатқан жоқ.
Сақтық жасамасақ, сан соғарымыз анық. Бас санитар дәрігер қаулы шығарған екен. Енді соны қалтқысыз орындап, үйімізден табылайық. Тәртіпке бағынбағанның тағдырынан тәлім алып, өзіміздің ұрпағымыздың, ұлтымыздың өмірін ойлайық.