Асуларды алады жастар әлі...(фоторепортаж)
Дана қазақ «Жас келсе – іске!» деп бекер айтпаса керек. Бүгінгі таңда алғыр да парасатты жастардың қоғамда алатын орны ерекше. Туған жерінен түлеп ұшып, туған ауданына келіп еңбек етіп жатқан жастардың қарасы жыл санап артуда. Бүгінде жастар саясатына қатысты басты басымдықтардың бірі – жас буынды жан-жақты білім алуға, отансүйгіштік пен патриотизмге тәрбиелеу. Осы мұратты жүйелі түрде жүзеге асыру мақсатында биылғы жылды Елбасы – Жастар жылы деп жариялады. Жыл аяғы да жақындады. Ел келешегінің кемелі қаншалықты артты? Құр ұрандатып шаралармен шектелген жоқпыз ба?
Өткен аптада ауданда жастар жылының қорытынды шарасы өтті. Жастар ресурстық орталығының ұйымдастыруымен «Қармақшы жалынды жастар мекені» атты жастар форумы өткізілді. Кең көлемде ұйымдастырылған шара әр аймақтағы белсенді жастарды ауданға тоғыстырды. Форум кітапхана жанындағы COWORKING орталығында басталды. Онда Ұлттық тренерлер пультінің жетекшісі Сабыржан Кеңшілік ауыл округтеріндегі жастар ісі жөніндегі мамандар арасында келер«Волонтерлар» жылына орай «Еріктілік және азаматтық қоғам» тақырыбында секциялық жұмыс жүргізді. Тренинг барысында қажет деген мамандықтар тізімі жасақталды. Нәтижесінде жастардың басым бөлігі IT және техникалық бағытты таңдады. Себебі олар көштен қалмауы керек.
Жастар үйі ғимаратында дебат және теннис ойынынан «Аудан әкімінің кубогі» сараланды. Дебаттық пікір сайыста биылғы жастар жылында атқарылған тың жобалар талқыға салынды. Биыл жастар жылында тың жобалар қабылданды. Дереккөзге сүйенсек бүгінде жастардың үлесі 4 млн-ға жуықтап қалған. Оның жартысынан көбі, яғни 77 процент – жалдамалы қызметкер. 23 процент өзін-өзі жұмыспен қамтып отыр. Ал не оқу оқымай, не еңбек етпей, құр жүрген жастардың қатары – 254 мың. Аз емес. Осы ретте «Жас маман», «Жас кәсіпкер» жобалары қолға алынды. Тіпті «Дипломмен ауылға» жобасы бойынша бір реттік жәрдемақы да көбейтілді. Алайда жастар қозғалысы баяу. Осы ретте «Біз осы масылдық танытып алған жоқпыз ба?» деген сауал туындайды. Тиімді пайдалана білсек, мемлекет тарапынан қолдау жетерлік.
Түскі үзілістен кейін форум аудандық өлкетану музейінде жалғасты. Онда қонақтар мұражайдағы түрлі экспонаттармен танысты.Жастар форумының қорытынды кеші «Малике ана» мейрамханасында үлкен форматта өтті. Кеш қонағы болып аудан әкімі Мұса Қалдарбеков, әкім орынбасары Жарқын Омаров және облыстық жастар саясаты мәселелері басқармасының басшысы Қуаныш Жанұзақов қатысты. Шара биылғы жылы жастардың өңірде атқарған жұмыстарына шолудан басталды. «Бизнес періште» жобасы аясында жастарға егін егуге тегін жер берілген. Жақаевтың ізбасарлары Иіркөл ауылында еңбек лагерін ұйымдастырып бақша өнімін екті. Еңбегінің жемісін көріп, мол өнім алды.
Аудан басшысы осындай салада үздік нәтижеге қол жеткізген жастарға арналған «Жас шың» жастар сыйлығын табыстады. Сонымен қоса әр түрлі номинация бойынша 100000 мың теңге қаржылай сый жасалды. Атап айтсақ «Егістік батыры» Абзал Жақсылықов, «Жас жалын» Тоғжан Бақытова, «Үздік жас отбасы» Сәкен Мұратов, «Айбын» Амангелді Шәкімбаев, «Үздік ерікті жас» Сабихан Жүнісов, «Үздік жас маман» Айбек Жұмахмет, «Жас көшбасшы» Мұратбек Айжігіт, «Жас барыс» Ғалымжан Әбдірахманов, «Жас дарын» Аяжан Шалбай, «Үздік денсаулық сақшысы» номинациясымен Назерке Пірманова марапатталды. Сонымен қатар аудан әкімінің алғыс хатымен жастар саясатына белсене атсалысып жүрген бірқатар сала маманына марапат жасалып, құрмет көрсетілді. Дебат ойыны мен үстел теннисінен жеңіске жеткен командаға аудан әкімінің кубогы берілді. Қызылорда облысының жастар саясаты мәселелері басқармасының басшысы Қуаныш Қуантқанұлы форумға келген қонақтар мен жастарға құттықтауын жеткізіп, жастар саясаты саласының дамуына үлес қосып жүрген жастарға облыс әкімінің орынбасары және басқарма басшысының алғыс хаты табысталды.Кеш соңында республикаға танымал жас ғалымдар өздерінің жаңа технологиялық жобаларын жастарға таныстырды.
Ерсін СӘДУҰЛЫ
