Сыңғырла, күміс қоңырау
Қоңыр күздің алғашқы күнімен келетін алғашқы қоңырау салтанаты ел аумағында жыл сайын ерекше тойланады. Үш ай демалыстан соң, алтын ұя мектебіне сағына жеткен мұғалімдер мен оқушылардың қуанышында шек жоқ. Тағы бір оқу жылы артта қалып, жаңа оқу жылы басталды.
Білім күні – алтын ұясына сағына ұмтылып, шұрқыраса табысатын шәкірттердің ғана емес, білім мен тәрбиені кие тұтқан абзал ата-аналар мен ұлағатты ұстаздың да мерейлі мерекесі. Бұл күні қариялар немересін мектепке жетелесе, табалдырығын жаңа аттаған бүлдіршіндердің көңілі алып-ұшып, алғашқы ұстазымен қауышқанша тағатсыздана асығады. Иә, 1 қыркүйекте еліміздің барлық өңірінде алғашқы қоңырау соғылып, балалар мектепке барды.
Жексенбіде аудандағы білім беру ордаларында алғашқы қоңырау салтанаты өтті. Кент орталығындағы №30 орта мектебі мен №27 орта мектебінде өткен алғашқы қоңырау салтанатына аудан әкімінің міндетін уақытша атқарушы Әділ Қошалақов қатысып, Білім күні мерекесімен құттықтады.
– Баршаңызды жаңа оқу жылымен құттықтаймын. Әрбір адамның өміріне ерекше әсер қалдыратын, ұстаздар қауымының алғашқы жұмыс күнімен, мектеп табалдырығынан аттауға асыққан бірінші сынып оқушыларының толғанысын айғақтайтын ұмытылмас сәттерімен есте қалады. Біздің елімізде жыл сайын сапалы білім беруді қамтамасыз етуге ерекше назар аударылып келеді. Еліміздің ертеңі мен кемел келешегі үшін жасап жатқан қажырлы қызметтеріңізге табыс тілеймін. Балаларымыздың болашағы айқын, қадамы жарқын болсын, – деді Әділ Үсенұлы.
Осы оқу жылында «Ауыл – ел бесігі» жобасы аясында күрделі жөндеуден өткен №30 орта мектебінің 4 оқуда ғимаратының 2 ғимараты бүгінде пайлануға беріліп отыр. Сонымен қатар №27 орта мектебінде де алғашқы қоңырау салтанаты өтіп, балақайларды мектепке қабылдады. Аталған мектептің 2 ғимаратының 1 негізгі оқу ғимаратының құрылысы аяқталды. Мұнан өзге асхана мен ойын алаңы пайдалануға беріледі деп күтілуде.
Жаңа оқу жылына аудан мектептері толықтай дайын. Атап айтатын болсақ, жалпы білім беру мекемелерінің материалдық-техникалық базасы жыл сайын тиісті талап-деңгейге келтірілуде. Мектептердегі жылумен жабдықтау жүйесін қайта жаңғырту жұмысы жүргізілді.
Ғимарат ішінде орналасқан бу қазандығын сыртқа шығару жұмысына 5 мектепке облыстық бюджеттен қаржы бөлініп, қазіргі таңда №27, №29, №105, №28 мектептердің жұмысы толығымен аяқталып қабылданды. Сонымен қатар Көмекбаев елді мекеніндегі №185 орта мектептің сұйық отын жылу қазандығы сұйытылған газға ауыстырылды.
Биылғы оқу жылында жаңартылған білім беру мазмұны бойынша сыныптар толығымен көшірілетін болады.
Ақнұр САҒЫНТАЙ
