Уәде орындалды
Кешелі бүгінді көпшілік жұрт қуанып жүр. Қуануға негіз бар. Естеріңізде болса жақында ғана Қазақстан Республикасының Президенті Қасым-Жомарт Кемелұлы Тоқаев әлеуметтік аз қамтылған, көп балалы және тұрмысы төмен азаматтардың кредитін кешіру туралы жарлыққа қол қойған болатын. Кешеден бері банктен смс хабарлама келіп, қараша халық қарызынан құтылып, арқасынан ауыр жүк түскендей жеңілдеп, мәз мейрам болуда. Біз бұған қуанамыз. Жақында ғана Қ.Тоқаев халыққа арналған алғашқы жолдауында "Мен халыққа берген уәдемді орындаймын!" деген болатын. Берілген уәдесін орындап жатыр. Ұзағынан болғай! Осыдан бірнеше ай бұрын президент сайлауы болар кезде, сайлауалды үгіт-насихат жұмыстары жүргізіліп жатқан тұста "Президенттікке үміткер Тоқаев халықтың кредитін жауып тастаса, бәрі соған дауыс берер еді" деп қалжыңдағам. Сол сәтте періштелер әумин деді ме, үкімет халықтың қарызын жабуға көмектесіп жатыр. Бұрын банктен қоңырау келсе трубканы көңілсіз көтеретін жұртшылық, қазір банк жағалап, жағымды жаңалық күтіп жүр.Әзиз ДҮКЕНБАЙ
