Содан соң аудан әкімі Сұлтан Мақашов өткен жылы аудан экономикасы мен өңір тұрғындарының әлеуетін арттыруға байланысты атқарылған жұмыстарды саралай келе Елбасының қолдауымен елімізде шағын және орта кәсіпкерлікті дамыту мақсатында қол жеткізілген жетістіктер, сонымен қатар салықтық базаны ұлғайту және оның нәтижесі туралы әңгімеледі. Аймақ басшысының үстіміздегі жылды кәсіпкерлікті дамыту жылы деп белгілеуіне байланысты ауылдық жерлерде жұмыссыздықты жою мақсатында тұрғындарды, оның ішінде жұмыссыз азаматтарды кәсіпкерлікке тарту жайында әңгіме тінін тарқатты.

Аудан басшысы аталған жұмыстарды саралай келе, әсіресе Елбасының қолдауымен елді мекендерде кооператив құру жұмыстарына аса мән беру керегін, құрылған кооперативтер арқылы елді мекендерде көп жұмыс атқаруға болатынын тілге тиек етті. Осы жұмыстарға ауылдардағы шаруашылық басшыларына да үлес қосуға шақырды және оның тиімділігіне тоқталды Сондай-ақ, мемлекеттік бағдарламалар арқылы елді мекен тұрғындарын, оның ішінде жастарды кәсіпкерлікке тарту керегін, алдағы уақытта бірнеше елді мекендер орталығындағы көшелерге күрделі жөндеу жұмыстары жүргізілетінін жеткізді. Ауданда өткен жылы төрт түлік басы біршама өскендігін, ол мемлекеттік бағдарламалар мен кооперативтер арқылы жүргізіліп жатқан жұмыстардың жемісі екенін, сонымен бірге аудан кәсіпкерлерінің нәтижелі еңбектерімен ауданда біршама іргелі істер атқарылғанын баяндады. Нақтырақ айтқанда, өткен жылы кәсіпкерлермен 330 жоба бойын­ша түрлі қаржы ұйымдары арқылы жеңілдетілген несие алынса, 29 елді ме­кеннің 18-і сапалы жер асты сумен қамтамасыз етілді. Ал, ағымдағы жылы бір­неше ауыл көшелеріне және «Батыс Еуропа-Батыс Қытай» халықаралық автожолынан Дүр Оңғар, Иіркөл, Төребай би ауылдары мен Төретам кенті, Ақжар-Көмекбаев автожолы аралығы мен Қызылтам елді мекені кіребіс жолдарына жөндеу жұмыстарын жүргізу жоспарлануда.

Аудан орталығындағы тұрғын үйлер­ді газдандыру мәселесі де шемімін та­уып, Жосалы кенті тұрғындарының көгіл­дір отынға қол жеткізер күні де алыс емес. Иіркөл, Төребай би ауылдарында құрылыс жұмыстары өткен жылы бас­талған екі 50 орындық балабақша мен кент орталығындағы №183 орта мектеп ел игілігіне пайдалануға беріледі.

Есепті кездесулерде интер­нац­ионалдық Г.Мутиев ауылдағы кейбір кө­ше­лердің электр бағаналарын ауыс­­тыру, М.Арифов ауылдық мә­дениет үйіне 1 штаттық бірлік беру, дүроңғарлық А.Тұрмаханов жер үлес­­керлері мен шаруашылық ара­сын­дағы келісім-шартты жүзеге асыру, Т.Ерәлиев пен Т.Омаров №107 орта мектепке күрделі жөндеу жұмыстарын жүргізу, ауылға жаңа медициналық бекет салу, көшелерді жарықтандыру туралы мәселелерін көтерді. Сондай-ақ, иіркөлдік М.Ербола­тов пен Б.Әбдірасылов ауыл маңы­нан өтіп жатқан «Балажарма» кана­лын тазарту, интернет желісінің жылдамдығын арттыру, бақша егу үшін трактор алуға көмектесу, ауыл­дан жайылымға шыққан төрт түлік өту үшін «Батыс Еуропа-Батыс Қытай» халықаралық автодәлізі бойынан өткел салу сияқты көптен түйіні шешіл­мей келе жатқан сұрақтарын қойды.

Аудан әкімі тұрғындар тарапынан көтерілген мәселелерді зерделей келе, ағымдағы жылы бірнеше ауылдық округ көшелеріне жөндеу жұмыс­тары жүргізі­летін және атқа­ры­^­латын жұмыстардың ішіне электр бағаналарын ауыстыру, жарықтандыру, арықтарға лотоктар орналастыру кіретінін, №107 орта мек­тепке күрделі жөндеу жұмыстарын жүргізу жоспарда бар екенін айтты. Сонымен бірге, бақша егемін деген аза­матқа қай кезде де қолдау көрсе­тілетінін және тіркемесімен, басқа да құрал-жабдықтарымен трактор алып беруге жұмыс істейтінін айтып қуантты. Сонымен қатар, мамандарға «Балажарма» каналын тазарту жұ­мыс­тарын жүргізуге тиісті құжаттар дайын­дауды тапсырды.

Келесі кезекте аудан әкімі Ақай ауылы және Төретам кенті тұрғындары алдында өткізген есепті кездесуінде ғарышкерлер айлағында орналасқан аталмыш екі елді мекен тұрғындарының әлеуметтік тұрмыс-тіршілігін арттыру мақсатында өт­кен жылы атқарылған жұмыстар мен алдағы уақытқа мақсатталған жоспарларды баяндады.

Нақтырақ айтқанда, өткен жылы осы екі елді мекен тұрғындары үшін Ресей үкіметі жалға алған 1160 гектар жер Қазақстанға кері қайтарылып, алдағы уақытта қайтарылған жер телімі елді мекен тұрғындарының ауылшаруашылығы және кәсіпкерлік саласын дамытуға жол ашады. Байқоңыр қаласындағы 6 білім беру мекемесінің жылу жүйелері модульді бу қазандықтары арқылы газға көшірілді. Халыққа қызмет көрсету орталығы тұрғын­дарға жан-жақты қызмет көрсету­де, жаңадан пайдалануға берілген облыстық меди­циналық орталығының филиалы ғарышкерлер айлағы тұрғын­дарына сапалы медициналық қызмет көр­сетуде. Оған қоса ағымдағы жылы емханалық қызметті де көрсетуді бастайды. Сонымен қатар, дене­шынықтыру және сауықтыру кешені құрылысы биылғы жылы аяқ­талып, ел игілігіне пайдалануға беріледі деп күтілуде. Тағы бір айта кетерлік жайт, өңір тұрғындарын Байқоңыр қаласы мен Ақай елді мекені шекарасынан ағып жатқан Сырдария өзенінің арғы бетіндегі елді мекендермен қарым-қатынасты күшейту мақсатында көпір салынады және Байқоңыр қаласындағы қазақ­стандық азаматтардың әлеу­меттік жағдайын жақсартуға байланысты 5 көп қабатты тұрғын үй құрылысы басталады. Сондай-ақ, аталмыш екі елді мекеннің экономикасы мен тұрғындар әлеуетін арттыру мақ­са­тында басқа да атқарылатын жұмыс­тарға тоқталды.

Жиын барысында аудан әкімі Сұлтан Ысқақұлы өңір тұрғындары жолдаған сауалдарға зейін қойып, көтерілген мәсе­лелер төңірігенде тұшымды жауап­тар берді.