Тағы бір ескі банкнот қолданыстан шығады

Қазақстанда номиналы 1000 теңгелік ескі банкноттарды қабылдау тоқтатылады, деп хабарлайды Stan.kz ақпарат агенттігі. 



ҚР Ұлттық банкі 2021 жылы 3 наурызда 2006 жылғы үлгідегі номиналы 1 000 теңгелік банкноттарды айырбастау кезеңінің аяқталатынын еске салады.
"2006 жылғы үлгідегі номиналы 1000 теңгелік банкноттарды айырбастау 2017 жылдың 2 наурызында басталды, енді ол 2021 жылдың 3 наурызына дейін жалғасады. Көрсетілген мерзімнен кейін Ұлттық Банктің филиалдары аталған банкноттарды қабылдау мен айырбастауды тоқтатады", - деді ведомствода.



Банкноттарды қолданыстағы ақша белгілеріне айырбастау тек қана Ұлттық Банктің филиалдарында жүзеге асырылады. Филиалдардың мекен-жайы мен байланыс телефондары Ұлттық Банктің сайтында көрсетілген. 
Қосымша сұрақтар туындаған жағдайда, Ұлттық Банктің 1477 нөмірі бойынша байланыс-орталығына хабарласуға болады.
Еске сала кетейік, 1 ақпаннан бастап Ұлттық банктің филиалдары 2006 жылғы үлгідегі номиналы 2000, 5000 және 10 000 теңгелік банкноттарды қабылдауды және айырбастауды тоқтатты.