Адам саудасы. Иә, зат емес, кәнігі адам. Бұл қалай деймісіз? Мәселен бұған бала немесе өзін-өзі жарнамалап, тәнін саудалағаны жатады. Оның ішінде мәжбүрлісі де бар. Адам саудасы – ауыр қылмыс, ғаламдық проблема. Сондықтан әлем елдері қоғамды шырмаған қылмыстың осы түрімен бірлесіп күресуді қолға ала бастады. Бұл күрес өзіміздің өңірде де толастамайды. ҚР Ішкі істер министрлігінің нұсқауына сәйкес Қармақшы ауданы көлемінде қыркүйек айының 19-ы мен 21-і аралығында «Stop трафик» жедел профилактикалық іс-шара өтуде. Мақсат – адам саудасының алдын алу, жолын кесу, әрі оны анықтау.

– Бұл сауда өте маңызды трансұлттық қылмыс және адамның құқығы мен бостандығын өрескел бұзу әрекеті. Мұны көп жағдайда жеке адамға қатысты проблема дегенімізбен, бұл – жеке бастың ғана емес, мұндай қылмысқа жол беру – сол мем¬лекет құқығының өрескел бұзылуы. Бұл әр елдің ұлттық қауіпсіздігіне, мемлекеттің экономикалық тұрақтылығына және барша азаматтың өмірі мен әл-ауқатына төнген үлкен қауіп. Сондықтан бір¬лесіп күресуіміз қажет, – дейді Қармақшы аудандық Полиция бөлімі КПб-нің жедел уәкілі, полиция капитаны А.Иманов.