Жаңа оқу жылында оқушылар қанша күн демалады?
Оқу-ағарту министрлігі 2026-2027 оқу жылының басталу және аяқталу мерзімдерін, сондай-ақ демалыс кестесін бекітті, деп хабарлайды Egemen.kz.
Министрліктің мәліметінше, жаңа оқу жылы 2026 жылдың 1 қыркүйегінде басталып, 2027 жылдың 25 мамырында аяқталады.
«Бірінші тоқсан 8 оқу аптасына созылады. Күзгі демалыс 26 қазаннан 1 қарашаға дейін жалғасып, 7 күнді құрайды. Екінші тоқсан да 8 оқу аптасына жоспарланған. Қысқы демалыс 28 желтоқсаннан 2027 жылғы 10 қаңтарға дейін жалғасады. Демалыс ұзақтығы 14 күн болады», делінген хабарламада.
Бірінші сынып оқушылары үшін 2027 жылғы 8-14 ақпан аралығында қосымша 7 күндік демалыс қарастырылған.
Үшінші тоқсан 10 оқу аптасына созылады. Көктемгі демалыс 2027 жылғы 22-28 наурыз аралығында болады. Ал төртінші тоқсан 8 оқу аптасына жалғасып, оқу жылы 2027 жылдың 25 мамырында аяқталады.
