Париждегі автосалонға Lego-дан құрастырылған көлік шығарылды

«Көлік үлкендердің ойыншығы» деген сөз жиі айтылады. Париж автосалоны осыны тағы бір дәлелдегендей.
Франция астанасында ашылған әйгілі көрмеде «Лего» компаниясы құрамалы ойыншық бөлшектерінен жасалған Bugatti Chiron (Бугатти Широн) суперкарын көрсетті. Ерекше көліктің фары, рөлі, орындығы, тіпті қозғалтқышы секілді барлық бөлігі ойыншықтан құрастырылған. Тек көліктің дөңгелегі ғана шын «Бугаттидікі». Дегенмен,  «Лего» суперкары сағатына 30 шақырым жылдамдықпен қозғала алады. Ойыншық көлікті құрастыруға 30 адам тер төгіп, 1,5 тонна бөлшек жұмсалған. Осы және өзге де жаңа көліктерді әйгілі Париж автосалонынан тамашалауға болады. Автокөрме қазанның 14-іне дейін жалғасады.