ҚАРМАҚШЫ АУДАНЫ АҚАЙ АУЫЛЫНДА СПОРТ КЕШЕНІ АШЫЛДЫ
Қармақшы ауданының Ақай ауылында жаңа дене шынықтыру-сауықтыру кешенінің салтанатты ашылу рәсімі өтті. Бұл қуанышты сәтке облыс әкімі Нұрлыбек Нәлібаев арнайы келіп қатысты. Аймақ басшысының Қармақшы ауданына жұмыс сапары барысында жүзеге асқан маңызды шара ауыл тұрғындары үшін үлкен мәртебе болды. Ашылу рәсіміне ҚР Парламенті Сенаты мен Мәжілісінің депутаттары Руслан Рүстемов, Мұрат Әбенов, Мархабат Жайымбетов, Мұрат Ергешбаев, сондай-ақ зиялы қауым өкілдері мен ауданның ел ағалары, тұрғындар қатысты.Салтанатты жиында сөз алған облыс әкімі Нұрлыбек Нәлібаев жиналған қауымды жаңа спорт кешенінің ашылуымен құттықтап, бұл игі істің халықтың денсаулығын нығайтып, жастарды спортқа баулудағы маңызын ерекше атап өтті.
Жаңа дене шынықтыру-сауықтыру кешені ауыл жастары үшін таптырмас мүмкіндік. Мұнда күрес, шығыс жекпе-жегі, бокс, шахмат және фитнес залдары жұмыс жасайтын болады. Бұл – әр жастағы ауыл тұрғындары үшін спортпен жүйелі түрде айналысуға жағдай жасалғанын көрсетеді.Аталған шара барысында Қармақшы ауданының әлеуметтік-экономикалық дамуына үлес қосқан бірқатар азаматтар мен спорт кешенін салуға атсалысқан құрылысшылар облыс әкімінің Алғыс хаттарымен марапатталды. Сонымен қатар, ҚР Парламенті Мәжілісінің депутаты Мұрат Әбенов та жұртшылыққа жүрекжарды тілегін жеткізіп, ауыл халқын айтулы мерекемен құттықтады.
Жаңа кешен ауыл тұрғындарының қуанышын еселей түсті. Мәселен, Елеу Көшербаев атындағы №279 мектептің мұғалімі Айнұр Бүршік енді бос уақытын тиімді өткізу үшін фитнес залына жиі келіп тұруды жоспарлап отыр. Ол әріптестерімен бірге кешкілік уақытта дене шынықтырумен айналысып, салауатты өмір салтын ұстануға бел буғанын жеткізді.
Ал 11 жастағы ауыл тұрғыны, спортқа жаны құмар Нажмадин Серіков үшін бұл кешеннің ашылуы – көптен күткен қуаныш. Бұған дейін бокс үйірмесіне қатысу үшін іргелес жатқан Төретам кентіне барып жүрген Нажмадин енді Ақай ауылында өз спорттық шеберлігін дамыта алады. Бұл – оның арманына бастар үлкен мүмкіндік.
Сол секілді №277 мектептің 10-сынып оқушысы Жансая Мұхамбетов та үш жылдан бері шахмат үйірмесіне қатысып, түрлі облыстық, аудандық жарыстарда топ жарып жүр. Жаңа кешеннің ашылғанына ерекше қуанып, алдағы уақытта биік белестерді бағындыруға талпынатынын айтты.
Спорт кешенін аралаған облыс әкімі әрбір үйірмеге қатысып жатқан балалармен емен-жарқын тілдесіп, оларға сәттілік тілеп, спортқа деген ынталарын арттырды. Сондай-ақ, өңір басшысы кешеннің бір қабырғасына өз қолтаңбасын қалдырып, бұл сәтті есте қалдырды. Бұл кешен – тек спортпен шұғылданатын орын ғана емес, ауыл өмірінің жаңа тынысы. Ақайлықтар үшін бұл – үлкен серпін, жаңа бастамалардың бастауы болмақ.
