Трамп АҚШ-та бензин арзандайтынын айтты: Венесуэламен ірі мұнай келісімі жасалды

АҚШ президенті бұл мұнай келісімін әлем тарихындағы ең ірі келісім деп атады. Оның айтуынша, АҚШ мемлекеттік хатшысы Марко Рубио мен Қорғаныс министрі Пит Хегсет Венесуэланың уақытша президенті Делси Родригеспен «жеке бизнеспен серіктестік аясында» келісімге келген.

Алайда Трамп келісімнің нақты егжей-тегжейін ашпады және АҚШ-тың бұл келісім аясындағы міндеттемелері туралы ақпарат бермеді. Ол тек келісімге «америкалық салық төлеушілер үшін ешқандай шығынсыз» қол жеткізілгенін атап өтті.

BBC-дің орыс қызметінің мәліметінше, Трамптың мәлімдемесіне әзірге жария түрде түсініктеме бермеген Делси Родригес құрамында 63 миллиард баррель мұнайы бар кен орындарын игеру үшін жеке бірлескен кәсіпорынға 100 жылдық концессия берген.

Бұл кәсіпорын АҚШ үкіметі мен Венесуэлада мұнай саласында тәжірибесі бар жеке оператордың бірлескен жобасы ретінде сипатталады. АҚШ үкіметі бақылаудың 55 пайызын сақтап қалады. Бұл үлес кәсіпорындағы қатысу үлесі мен мұнайды өзіндік құны бойынша өндіру құқығын қамтиды.

3 қаңтарда Венесуэла президенті Николас Мадуро мен оның жұбайы Силия Флорес Трамп санкциялаған әскери операция барысында тұтқындалды. Осыдан бірнеше сағат өткен соң Трамп оның әкімшілігі Венесуэланы «қауіпсіз, тиісті және ақылға қонымды өтпелі кезең» орнағанға дейін басқаратынын мәлімдеді. Сонымен қатар АҚШ Венесуэла мұнайының сатылымын белгісіз мерзімге бақылауда ұстайтынын айтты.

Венесуэла әлемдегі дәлелденген мұнай қоры ең көп ел саналады. Оның мұнай қоры шамамен 303 миллиард баррельді құрайды. Алайда 1990 жылдардың соңындағы ең жоғары көрсеткішпен салыстырғанда мұнай өндіру көлемі күрт төмендеген.

Трамп америкалық мұнай компанияларын Венесуэланың мұнай өнеркәсібін қалпына келтіруге кемінде 100 миллиард доллар инвестиция салуға шақырды.