Манас қаласының аты ауыспайды
Қырғызстан Президентінің баспасөз хатшысы Аскат Алагозов әлеуметтік желілерде тараған Жалал-Абад облысындағы Манас қаласы бұрынғы атауына қайта оралады деген ақпараттың шындыққа еш жанаспайтынын мәлімдеді, деп хабарлайды Egemen.kz.
Оның айтуынша, Манас қаласының атауын өзгерту мәселесі күн тәртібінде қаралмаған және алдағы уақытта да қарастырылмайды. Қала қазіргі Манас атауын сақтап қалады.
Еске салсақ, Жалал-Абад қаласын Манас деп қайта атау бастамасын сол кездегі шаһар мэрі Эрнисбек Ормоков көтерген еді. Оның айтуынша, бұл ұсыныс тұрғындар мен ақсақалдар тарапынан түскен.
2025 жылғы 3 қыркүйекте Жалал-Абад қалалық кеңесінің депутаттары қаланың атауын өзгерту жөніндегі бастаманы қолдады. Ал 10 қыркүйекте Жогорку Кенеш қаланы Жалал-Абадтан Манас деп қайта атау туралы заң жобасын үш оқылымда бірауыздан мақұлдады.
Кейін 17 қыркүйекте құжатқа Қырғызстан Президенті Садыр Жапаров қол қойып, заң 27 қыркүйекте ресми түрде күшіне енді.
