Бүгін Жерде ғаламдық деңгейдегі аса қуатты магниттік дауыл соғады
Жерде ғаламдық ауқымдағы аса қуатты магниттік дауыл тіркеліп отыр. Оның күші ең жоғарғы G5 деңгейіне жеткен. Бұл құбылыс соңғы күндердегі Күн белсенділігінің күрт артуы нәтижесінде, сондай-ақ бүгін тәулік ішінде күтілетін үш плазмалық бұлттың алғашқысы Жерге жеткен сәтте байқалып отыр, деп хабарлайды Egemen.kz Ресей Ғылым академиясы Ғарыш зерттеулері институтының Күн астрономиясы зертханасының мәліметтеріне сілтеме жасап.
«Қазіргі геомагниттік жағдай болжаммен салыстырғанда түсініксіз түрде өзгеше болып тұр. Түнде планетаға тек күтіліп отырған үш плазмалық шығарындының біріншісі (ең әлсізі) келіп, G1–G2 деңгейіндегі әлсіз дауылдар тудыруы тиіс еді. Негізгі әсердің шарықтау шегі тәуліктің ортасына қарай болады деп болжанған », делінген хабарламада.
Ғалымдардың айтуынша, мұның жалғыз түсіндірмесі – кеше болған биылғы ең қуатты X5.1 класты Күн жарқылының нәтижесінде пайда болған соңғы плазмалық бұлттың өте жоғары жылдамдықпен қозғалып, алдында таралып бара жатқан баяу плазмалық бұлттарды қуып жетіп, оларды қысып, температураны, тығыздықты және магниттік сипаттамаларды күрт арттыруында.
Қазіргі уақытта тәуліктік нақты болжам жоқ. Себебі қазіргі модельдер мұндай шектен тыс экстремалды оқиғаларды дәл есептей алмайды.
