Мыңдаған балық өлі табылды

Грузиядағы орталық саябақ аумағы арқылы өтетін Нуригель көлінде мыңдаған өлі балық табылды. Сондықтан Қара теңіз жағалауында орналасқан Батуми шипажайы демалушылары балықтан жасалған тағамдарды абайлап тұтынуы керек. Мамандар осындай ескерту жасады. Олардың айтуынша, Нуригель көлінде экожүйе бұзылған. Судың құрамында цианобактерия мөлшері мен улы көк-жасыл балдырлар көбейген. Ол балықтың ғана емес, адамдардың да денсаулығына зиян. Салдарынан бұлшық ет аурулары қозып, бауырдың жұмыс істеуі нашарлап, тері тітіркенуі мүмкін. Ал балықтар оттегінің жетіспеуінен қырылып жатыр екен. Айта кету керек, бұл аймақта балық аулауға рұқсат бұрыннан жоқ. Бірақ мұндай тыйым балықшылардың көл жағалауында сағаттап уақыт өткізуіне кедергі бола алмай тұр.