Черногориядағы Абай орталығы
Черногорияның Ұлттық кітапханасында (Подгорица) қазақтың ұлы ақыны, философ, ағартушы Абай Құнанбайұлының 180 жылдық мерейтойына орай Абай орталығы салтанатты түрде ашылды.
Іс-шара Қазақстан Республикасының Сыртқы істер министрлігі мен Мәдениет және ақпарат министрлігінің қолдауымен ұйымдастырылды. Алқалы жиын Абай шығармашылығын халықаралық деңгейде насихаттау мақсатын көздейді.
Абай орталығының ашылу салтанатына Черногорияның Қазақстан, Аустрия, Германия, Словакия, Испания, Италия, Мажарстан, Болгария, Түркия және Греция елшіліктерінің дипломатиялық өкілдері, зиялы қауым өкілдері, қоғам белсенділері қатысты.
Абай орталығына жүзден аса құжат табыс етілді. Олардың ішінде қазақ, орыс, ағылшын, қытай, т.б көптеген тілге аударылған ақынның шығармалары, қарасөздері, абайтану кітаптары, өмір жолы мен шығармашылығына қатысты құнды деректер, сонымен қатар қазақ жазушылары Әбіш Кекілбайұлы, Кемел Тоқаев, Таласбек Әсемқұлов сынды ұлт зиялыларының кітаптары бар. Бұл құжаттар Ұлттық академиялық кітапхана мен Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығынан алынды.
egemen.kz
