Табиғи апаттарға тосқауыл: малайзиялық үлгі
Фото: tutu.ru
Су тасқынының салдары тосын табиғи апаттарға дайын емес екенімізді ұғындырды. Тасқын су әсіресе мемлекеттік қызметшілерді әбден әбігерге түсірді. Ендігі кезде өңір әкімдері малайзиялық әріптестерінен тәжірибе жинақтап, тосыннан келген табиғи құбылыстарға төтеп бермек.
Малайзия – табиғи апат кезінде, одан кейін мемлекеттік қызметшілердің іс-қимыл алгоритмдерін жіті құрастырған бірден-бір ел. Өйткені бұл мемлекетте жауын-шашын мен су тасқыны жиі болады. Құрал-жабдықтарымен қатар әкімшілік қызметкерлері әр кезде сақадай сай тұрады. Осы салада жылдар бойы жинаған тәжірибелерін Малайзия Қазақстанның мемлекеттік қызметкерлерімен бөлісуге дайын.
«Су тасқынын басқару – өте маңызды іс. Қазақстан мұндай ауқымды селді күтпегенін түсінеміз, бірақ әлемде климаттық өзгерістерге байланысты нөсер жауыннан туындаған су тасқыны алдағы уақытта да қайталана бермек. Біз табиғи апат кезінде және одан кейін мемлекеттік қызметшілердің іс-қимыл алгоритмдерін жетілдіру үшін Қазақстанмен тәжірибе алмасуға дайынбыз. Малайзия Мемлекеттік басқару академиясы тарапынан мемлекеттік қызметшілердің біліктілігі мен коммуникативтік дағдыларын арттыру бойынша оқыту курстарын ұйымдастыруға әзірміз. Дағдарыс кезінде жұмыс істейтін мамандардың біліктілігі жоғары болуы және халықтың мұң-мұқтажын түсіне алуы керек», деді Президент жанындағы Мемлекеттік басқару академиясында өткен кездесуде Малайзия Парламенті Сенаты төрағасының міндетін атқарушы Нур Джазлан Мохамед.
Малайзия – Қазақстанның Оңтүстік-Шығыс Азиядағы негізгі серіктестерінің бірі. Сондықтан алдағы уақытта түрлі дағдарыс кезінде өздері тәжірибеден өткізіп, әзірлеген дағдыларымен бөлісуге ниетті. Ал кездесу барысында Нур Джазлан Мохамед мемлекеттік қызметшілер жұмысының тиімділігін арттыру, мемлекеттік басқаруды цифрландыру және мемлекеттік сектор жұмысында жасанды интеллектіні пайдаланудың артықшылықтарын айтты. Академия ректоры Ерлан Әбіл Малайзия өкілінің ұсынысын қабыл алып, әріптестік байланыс орнатуға шақырды.
egemen.kz
