Ташкент метросында ерекше флешмоб ұйымдастырылды. Онда Өзбекстан Қорғаныс министрлігінің музыканттары соғыс жылдары орындалған әндерді шырқады. Жеңіс күніне арналған акция метрополитеннің барлық бекетінде жалғасты. Көпшілік өнерпаздармен бірге «Катюша», «Смуглянка» және  «Жеңіс күні» әндерін шырқады. Жалпы метрополитенде мұндай мерекелік шара алғаш рет ұйымдастырылып отыр екен. Өйткені бұған дейін мұнда тіпті суретке түсуге рұқсат етілмейтін. Сондықтан көпшілік жауынгерлермен бірге селфи жасады. Жалпы Екінші дүниежүзілік соғысқа Өзбекстаннан бір жарым миллионға жуық азамат аттанса, бүгінде соның 32-сінің ғана көзі тірі екен. Алишер Мухаммадиев,Ташкент қаласының тұрғыны: - 9-мамыр Жеңіс күніне арналған мерекелік шара биыл өте жоғарғы деңгейде басталып жатыр. Ұйымдастырушылар жұртқа көтеріңкі көңіл-күймен қатар мықты рух сыйлады. Көңіліміз бір көтеріліп қалды. Татьяна Калашникова,Ташкент қаласының тұрғыны, зейнеткер: - Біз бүгінгі ұйымдастырылған шараға өте ризамыз. Шын мәнінде жеңіс лебі сезіледі. Жақсы ұйымдастырылған.