АҚШ-та қар жауып, әуе рейстері кейінге шегерілді
АҚШ-тың оңтүстік бөлігінен солтүстіктегі Ұлы көлдер аймағына дейінгі аумақты қар басты.
Алай-түлей боран соғып, халықты әуре сарсаңға салып жатыр. Күннің күрт суытуы себепті апаттар да жиілеп, 3 адам опат болды. Оның ішінде 2 жасар қыз бар. Ұйытқыған жел ағашты құлатып, ұйқыда жатқан бүлдіршінді басып қалған. Тұрғындар жаз шығатын уақытта қар борағанына таң. Кей штатта оның қалыңдығы 30 сантиметрден асып кетті. Күннің қолайсыздығынан Миннесота штатында 400 әуе рейсі кейінге шегерілді. Ал синоптиктердің айтуынша, Миннесота, Висконсин және Мичиган штатындағы қазіргі ауа райы тағы бірнеше күн сақталып, алдағы күндері елдің шығыс өңіріне ойысады.
