Биыл Токиода шие ағаштары ерте гүлдеді
Токиода биыл сакура 9 күн ерте гүлдеп, қала тұрғындары табиғаттың керемет көрінісін тамашалау үшін жұмысын тастай сала, бақтарына ұмтылып жатыр.
Бұл – жай ғана уақыт өткізу емес, «ханами» деп аталатын ертеден келе жатқан ұлттық дәстүр. Әдетте шиенің бүр жаруын көру үшін шаһарға шетелдерден де саяхатшылар көптеп келеді. Мысалы, өткен жылы 10 шақты күнге созылатын әсем құбылысты тамашалауға 3 жарым миллионнан астам саяхатшы сапарлапты. Бірақ биыл шие ағаштары әдеттегіден ерте гүлдеп, көптеген шетелдік бұл сәтті жіберіп алуы мүмкін.
Кана Игараси, Токио тұрғыны:
– Ертеректе сакура сәуір айының бас кезінде бүр жаратын. Бірақ жыл өткен сайын ол ерте гүлдейтін боп барады. Қазір біраз уақытымызды бөліп, бақтарға барып, нағыз демалып қайтатын кез деп ойлаймын.
Жапонияда жаңа қаржы және оқу жылы да сәуір айында басталады. Бұл кездейсоқтық емес. Ақ және алқызыл гүлдер тазару мен жаңарудың белгісі, жемісті бастамалар мезгілі деп саналады.
