Қазақстандықтардың құжаттары қашан латын қарпіне ауыстырылады?
Латын әліпбиіне көшкен кезде қазақстандықтардың құжаттарын ауыстыру азаматтардың өтінішіне қарай жүзеге асырылады. Ал 2025 жылға дейін барлық құжаттарды латын графикасы негізінде мемлекеттік тілде беру жоспарланған. Бұл туралы Қазақстанның ішкі істер министрлігі мәлім етті, деп хабарлайды Stan.kz ақпарат агенттігі.
ІІМ баспасөз қызметі 2025 жылға дейін қазақстандықтардың төлқұжаттарын, жеке куәліктерін және басқа да құжаттарды латын графикасы негізінде мемлекеттік тілде беру жоспарланғанын хабарлады.
"Латын әліпбиіне көшу кезінде жеке басты куәландыратын құжаттарды ауыстыру азаматтардың өтінішіне қарай жүзеге асырылады. Бұрын шығарылған құжаттар олардың қолданылу мерзімі аяқталғанға дейін жарамды болады", - деді министрлікте.
Ведомствода қазіргі уақытта латын графикасына негізделген қазақ тілінің әліпбиі мақұлдау сатысында екенін атап өтті.
Бұған дейін мәдениет және спорт вице-министрі Нұрғиса Дәуешов Қазақстан азаматтарының есімін 2021 жылы латын графикасына негізделген алфавиттік тәртіпте жазу ережелері әзірленетінін хабарлады.
