«Қазақстанның киелі жерлерінің географиясы» форумы өтті

Қазақстан Республикасының Ұлттық музейінде   Мәдениет және спорт министрлігі ұйымдастырған «Қазақстанның киелі жерлерінің географиясы» жобасы бойынша II Республикалық форум өтті.

Форумның басты мақсаты – Қазақстан Республикасының Президенті Н.Ә.Назарбаевтың «Болашаққа бағдар: рухани жаңғыру» атты бағдарламалық мақаласын қолдау мақсатында еліміздің тарихи, аймақтық, музей білім беру ұйымдарын, белсенді азаматтарын қосу арқылы елдің бірыңғай мәдени кеңістігін дамыту болды.

Мәдениет және спорт министрлігінің баспасөз қызметі хабардар еткендей, форумға мемлекеттік органдардың өкілдері, өңірлердің мәдениет, туризм басқармаларының басшылары, республикалық, облыстық музейлер мен музей-қорықтардың директорлары, белгілі ғалымдар және т.б. қатысты.

Форумда 2017 жылы «Қазақстанның киелі жерлерінің географиясы» жобасы бойынша жүргізілген жұмыстардың қорытындысы шығарылып, келесі жылдарға арналған жоспарлар талқыланды.

Сонымен қатар, республикалық форум аясында «Рухани жаңғыру» атты көрме залы тұңғыш рет есігін айқара ашты. Көрмеде тарихи-құнды жәдігерлер келушілер назарына ұсынылды.  «Сақтар қазынасы» атты ерекше қойманың ашылу салтанаты өтіп, келушілердің назарына бірінші рет сақ, сармат дәуіріне жататын жәдігерлердің түпнұсқалары ұсынылды.

Елбасының «Болашаққа бағдар: Рухани жаңғыру» мақаласы негізінде құрылған «Қасиетті Қазақстан» ғылыми-зерттеу орталығы мен «Туған жер»  қазақстандық өлкетанушылар қоғамдық бірлестігі 2017 жылы ауқымды жобаларды сәтті аяқтады. Жоба шеңберінде ғылыми экспедициялар ұйымдастырылған болатын. Бұл экспедициялардың нәтижелері екі кітап болып басылып шықты: «Қазақстанның жалпыұлттық қасиетті нысандары», «Қазақстанның өңірлік қасиетті нысандары».

Кітаптарда қасиетті нысандардың иллюстрациялық материалы, тарихи деректер, сондай-ақ аңыздар бар. Бұл жұмыстар оқу орындарында әдістемелік нұсқаулық, туристерге арналған анықтамалық материал ретінде өмірдің түрлі салаларында қолданылуы мүмкін.

Астана қаласы және Ақмола облыстарының, Алматы қ. мен Алматы облысының сауықтыру нысандарын қамтитын қазақ және орыс тілдеріндегі 2000 дана тиражбен Қазақстанның қасиетті нысандарына арналған энциклопедияның бірінші томы дайындалып жарияланды. Энциклопедияда нысандардың көрнекі материалы және олардың орналасу карталары көрсетілген.

Кездесу барысында атап көрсетілгендей, тарихи нысандар туралы қысқаша және толық ақпарат және «Қазақстанның қасиетті жерлерінің географиясы» көп функционалды виртуалды картасы таныстырылды. Фотогалерея, бейнелеу галереясы, қолданылатын қозғалыстағы белгішелер бар. Бұдан басқа, өзіңіздің смартфоныңыз, планшетіңіз немесе компьютеріңіз арқылы экскурсияға баруға болады.

Сондай-ақ, өңірлік маңызы бар объектілер бойынша «Қазақстанның қасиетті жерлерінің географиясы» интерактивтік карта халық назарына ұсынылды.

Әлеуметтік желілер үшін Қазақстанның жалпы ұлттық қасиетті объектілері туралы қазақ, орыс және ағылшын тілдеріндегі 40 секундтық хронометражды мобильді форматтағы бейнероликтер жұртшылыққа жол тартты.

«Министрлік өткен жылы еліміз бойынша Қ.А.Яссауи, Арыстанбаб кесенелері, Бекет ата, Сисем ата қорымдарының нысандары, Көне Тараз, Көне Түркістан, Отырар, Сауран, Сарайшық қалашықтары, Абай Құнанбаев мемориалдық кешені тәрізді 25 тарих және мәдениет ескерткішін реставрациялады. Олардың көпшілігі танымал киелі орындарға жатады.

Сондай-ақ, киелі орындар көп шоғырланған республикалық «Ұлытау», «Отырар», «Таңбалы» тарихи-мәдени музей-қорықтарының туристік тартымдылығын жақсарту мақсатында биыл олардың Сапар орталықтарының құрылысын бастаймыз. Бұл сапар орталықтар заманауи құрал-жабдықтармен қамтамасыз етіліп, туристерге жоғары деңгейде қызмет көрсетуге, мәдени-ағарту, ғылыми зерттеу жұмыстарын жандандыруға үлкен үлес қосады» – деп атап өтті форум ұйымдастырушылары.