Мерекені ұлықтаған балғындар

Наурыз мерекесіне орай аудан орталығындағы No21 Тоғжан бөбекжай-бақшасында «Ақ көгершін» кіші тобының тәрбиешілері Айжан Шаянбекова және Гүлмира Саукенованың ұйымдастыруымен «Қош келдің, Әз Наурыз!» атты мерекелік ертеңгілік өтті.

Мақсаты – Наурыз айының шығыс халықтарында жыл басы саналатындығын сәбилер санасына жеткізу. Наурыздың 21-інен 22-сіне қараған түні күн мен түннің теңелетінін, одан кейінгі күндері күннің ұзарып, түннің қысқаратындығын ұғындыру. Балаларға ұлттық салт-дәстүрлерді құрметтеп, оларды мақтан етуді үйрету, ұлтжандылыққа тәрбиелеу.

Ертеңгілікте бүлдіршендер ұлттық киім киіп, көрініс көрсетті. Мерекелік іс-шарада ән айтылып, би биленді. Тәрбиешілер балаларға ұлттық құндылық жайлы ақпараттар берді. Бүлдіршіндер қазақы тағамдармен танысып, олардың қалай жасалатынын білді. Ертеңгілікте бүлдіршіндер мерекенің мәнін түсініп, ұлттық құндылық туралы ұғымын кеңейтті.

Құралай АЛТАЙҚЫЗЫ