Халықаралық мұражай күніне байланысты аудандық тарихи-өлкетану музейінде "Музей түні" іс-шарасы өтті. Осы күні бүкіл әлемдегі мұражай қызметкерлерінің барлығы өздерінің кәсіби мерекесін атап өтеді. Халықаралық мұражай күні күнтізбеде 1977 жылы ICOM-ның (International Council of Museums — Халықаралық мұражай кеңесі) кезекті отырысында осы мерекені бекіту туралы ресейлік ұйымның ұсынысы қабылданған күн болып белгіленді.
Қармақшы аудандық тарихи-өлкетану музейінің қызметкерлерінің ұйымдастыруымен өткізілген іс-шарада жаңа тарихи жәдігерлер мен экспонаттар қойылды. «Музей түні» іс-шарасының негізгі ұраны көрермендер үшін ашықтық әрі қол жетімділік болып табылады. Соған сәйкес, «Музей түні» мерекелік көркемдік-мәдени акциясының басты мақсаты сан алуан өнер түрлерін дәріптеу және аудан тұрғындарының музей бағдарламаларына деген қызығушылығын аудару.