Қызылорда облысында мал ұрлығын жасаған 36 адам қолға түсті. Олардың 339 қылмысқа қатысы бары анықталды, - деп хабарлайды ҚазАқпарат тілшісі.

Биылғы төрт айда Қызылорда облысында 159 мал ұрлығы тіркелген. 2018 жылы 220 қылмыс анықталған болатын. Биыл ауыр қылмыстар саны артқан. Былтыр олардың саны бесеу болса, биыл 16 дерек тіркелді. Жыл басынан бері 339 мал ұрланған. Олардың небәрі 117-і табылып, иелеріне қайтарылған.  Қызылорда облысы Полиция департаментінің криминалдық полиция басқармасы мал ұрлығын жасаған 36 адамды қолға түсірді. Олардың 339 қылмыс жасағаны дәлелденіп отыр. Талдауға сәйкес 65% жағдайда мал еркін жайылымнан, ал қалған 35 пайызында ауладан және қоралардан ұрланған.

«Соңғы кездері өрісте жүрген малдарды сойып алып кету деректері орын алуда. Барлығы 31 факті анықталды. Қараусыз жайылып жүрген малды сойып алып кету бойынша Қызылорда қаласы мен Шиелі ауданында - 7-ден, Жаңақорғанда - 10, Қармақшыда - 4, Жалағашта - 2, Арал ауданында 1 қылмыс жасалды», - деп мәлім етті Қызылорда облыстық Полиция департаментінің баспасөз қызметінен.