МЕМЛЕКЕТ БАСШЫСЫ ҰЛЫҚТАЛДЫ
Үстіміздегі жылдың 12-маусымы – ел тарихындағы елеулі кезең, тарихи сәт болуымен есте қалды. Себебі, бұл күні – Қазақстанда екінші президент ант беріп, ресми түрде қызметіне кірісті. Аталған күні елордадағы Тәуелсіздік сарайында ҚР Президент сайлауында айқын басымдықпен жеңіске жетіп, Мемлекет басшысы атанған Қасым-Жомарт Тоқаевты ұлықтау рәсімі өтті. Рәсімде Мемлекеттік Ту мен Президент Байрағы, сонымен қоса, ҚР Конституциясы Тәуелсіздік сарайына әкелінген соң Қ.Тоқаев ҚР Президенті Мемлекеттік күзет қызметі бастығының рапортын қабылдады.
Мұнан кейін «Қазақстан халқына адал қызмет етуге, ҚР Конституциясы мен заңдарын қатаң сақтауға, азаматтардың құқықтары мен бостандықтарына кепiлдiк беруге, ҚР Президентiнiң өзiме жүктелген мәртебелi мiндетiн адал атқаруға салтанатты түрде ант етемiн», – деп мемлекеттік тілде Қазақстан халқына ант берді.
Сол секілді, жаңадан сайланған Қазақстан Президентінің қызметке кірісу құрметіне орай Мемлекеттік әнұран ойнатылып, зеңбіректерден 21 мәрте оқ атылды. Ақорда резиденциясының үстінде ҚР Мемлекеттік Туы көкке көтерілді.
Ұлықтауда Орталық сайлау комиссиясының төрағасы Берік Имашев Қасым-Жомарт Тоқаевқа ҚР Президентінің куәлігін тапсырды.
Өз кезегінде Мемлекет басшысы зор сенім артқан қазақстандықтарға алғыс айтып, тәуелсіз мемлекетіміздің негізін қалаушы Қазақстанның Тұңғыш Президенті – Елбасы Нұрсұлтан Назарбаевтың айрықша рөлін атады.
– Менің мақсатым – қоғамның бірлігін қамтамасыз ету және әрбір азаматтың құқығын қорғау. Қазақстанның ұлттық мүддесін әрқашан және барлық жерде қорғайтын боламын, – дей келе Қазақстан Президенті алда жүзеге асуға тиісті он негізгі бағытты белгілеп берді. Олар: халықтың табысын арттыру мен әл-ауқатын жақсарту, сыбайлас жемқорлыққа қарсы пәрменді іс-қимыл жасау, соттық-құқықтық реформа, әділетті әлеуметтік саясат, тұрғын үй, өңірлерді дамыту, тепе-теңдік және көпвекторлы сыртқы саясат, сондай-ақ, жастарды қолдау мәселесі.
Ұлықтау рәсімінің соңында ҚР Президенті – ҚР Қарулы Күштерінің Жоғарғы Бас қолбасшысы Тәуелсіздік сарайының алаңында Қорғаныс министрі Нұрлан Ермекбаевтан рапорт қабылдаса, ҚР Қарулы Күштерінің әскері Мемлекет басшысы алдында сап түзеді.
Дүниежүзі көз тіккен ҚР Президенті Қ.Тоқаевтың ұлықтау рәсіміне Тұңғыш Президент – Елбасы Н.Назарбаев, ҚР Парламенті депутаттары, Үкімет мүшелері, Жоғарғы сот судьялары, Конституциялық кеңес мүшелері, Президент Әкімшілігі мен Премьер-Министр Кеңсесінің өкілдері, орталық мемлекеттік басқару органдарының басшылары, Орталық сайлау комиссиясы мен Қазақстан Халқы Ассамблеясының мүшелері, діни конфессия өкілдері, Қазақстандағы дипломатиялық өкілдіктердің басшылары, президенттікке үміткер болғандар, «Nur Otan» партиясының басшылығы, іскер топ өкілдері, көрнекті ғалымдар, мәдениет және өнер қайраткерлері, жастар ұйымдарынан 2500 адам қатысты.
Сәрсенкүл РАЙЫМБАЕВА,
«Қармақшы таңы».
