АЗАМАТТАРҒА АЙТАР АЛҒЫС КӨП

Өткен жыл ауданымыз үшін толағай табыстарға, мейірім-шапағатқа толы болуымен есте қалды. Жаңа жыл қарсаңында аудандық жұмыспен қамту және азаматтардың хал актілерін тіркеу бөлімі, кент әкімшілігі мамандарынан комиссия құрылып, аудан тұрғындары арасында асыраушысынан айырылған, тұрмысы төмен және көп балалы отбасылардың жағдайымен танысты. 25 отбасыға көмек ретінде азық-түлік пен 2 тоннадан көмір берілді. Қармақшы ата мешітінің бас имамы Асхат Бекболатұлы жетекшілігімен де 30-40 үйге азық-түлік пен көмір таратылып, халықтың алғысына бөленді. Қазақ қашанда жетім мен жесірін жылатпай, кемтар жандарға сүйеу болған, қолдан келген көмегін аямаған ел. Қара басының емес, халықтың қамын ойлар, жүрегі мейірімге толы, жомарт азаматтарымыз көп болсын дегім келеді. Жанашыр жандарға кент тұрғындары атынан алғаусыз алғыс айтып, еңбектеріне жеміс тілеймін.