БІРЛІКПЕН БАСТАЛҒАН ИГІ ІС
Табиғатты қорғау мен тарихимәдени мұраны сақтау – қоғамның ортақ міндеті. Бұл бағыттағы жұмыстар жастардың белсенді қатысуымен жүзеге асқанда оның маңызы арта түседі. Осы мақсатта ұйымдастырылған республикалық жастар сенбілігінің алғашқы күні мазмұнды іс-шараларға толы болып, жастардың азаматтық жауапкершілігі мен қоғамдық белсенділігін айқын көрсетті.
Республикалық сенбілікке облыстық, қалалық және аудандық жастар ресурстық орталықтарының басшылары мен қызметкерлері, «Жасыл ел» еңбек жасақтарының еріктілері, сондай-ақ Абай, Түркістан, Қызылорда облыстары мен Шымкент қаласынан келген жастар ресурстық орталықтарының өкілдері қатысты. Әртүрлі өңірден жиналған жастардың ортақ мақсат жолында бас қосуы елдегі бірлік пен ынтымақтастықтың жарқын көрінісіне айналды.
Іс-шара барысында қатысушылар тарихи маңызы зор «Қарахан» кесенесінің маңында орналасқан «Жерасты мешіті» аумағында тазалық жұмыстарын жүргізді. Сенбілік кезінде аумақ қоқыстан тазартылып, айналасы ретке келтіріліп, тарихи-мәдени нысанның келбетін сақтау бағытында нақты жұмыстар атқарылды. Мұндай игі бастама табиғатты қорғаумен қатар, ғасырлар бойы сақталып келе жатқан тарихи мұраға деген құрметті де айқын аңғартты.
Бүгінде экологиялық мәдениетті қалыптастыру тек қоршаған ортаны таза ұстаумен шектелмейді. Ол туған жерге жанашырлық танытып, ұлттық құндылықтарды бағалай білумен тығыз байланысты. Осы тұрғыдан алғанда, тарихи орындардың аумағын абаттандыру – жастардың туған өлкенің тарихына деген қызығушылығын арттырып, мәдени мұраны келер ұрпаққа аман жеткізуге қосқан нақты үлесі.
Сенбілік аясында өзге өңірлерден келген қатысушылар үшін тарихи ескерткіштер мен мәдени нысандарға экскурсиялық шолу ұйымдастырылды. Қонақтар өңірдің бай тарихымен, сәулет ескерткіштерімен және олардың ел тарихындағы маңызымен танысты. Мұндай танымдық шаралар жастардың тарихи санасын қалыптастырып қана қоймай, өңіраралық мәдени байланысты нығайтуға да мүмкіндік береді.
Жастар арасындағы тәжірибе алмасу да іс-шараның маңызды бөлігінің біріне айналды. Әртүрлі өңірден келген жастар ұйымдарының өкілдері өзара пікір алмасып, қоғамдық жұмыстарды ұйымдастырудағы тәжірибелерімен бөлісті. Мұндай кездесулер болашақта бірлескен жобаларды жүзеге асыруға және жастар саясатын дамытуға жаңа серпін беретіні сөзсіз.
«Жасыл ел» еңбек жасақтарының еріктілері де сенбілік жұмыстарына белсене қатысып, қоршаған ортаны қорғау бағытындағы еңбектің маңызын тағы бір мәрте дәлелдеді. Жастардың белсенділігі табиғатты аялау мәдениетін қалыптастырумен қатар, қоғам алдындағы жауапкершіліктің де нақты көрінісі болды.
Республикалық жастар сенбілігінің алғашқы күні табиғатты қорғау, тарихи-мәдени мұраны сақтау және жастар арасындағы ынтымақтастықты нығайту мақсаттарын тоғыстырған мазмұнды шара ретінде есте қалды. Осындай бастамалар жастардың қоғамдық белсенділігін арттырып қана қоймай, туған жерге деген сүйіспеншілік пен ортақ жауапкершілік сезімін нығайтуға ықпал етеді.
Табиғатқа жанашырлық танытып, тарихи мұраны көздің қарашығындай сақтау – әр азаматтың парызы. Ал осындай игі іске жастардың ұйытқы болуы қоғамның болашағына деген сенімнің айқын көрінісі. Республикалық сенбіліктің алғашқы күні осының жарқын дәлелі болды.
Бауыржан Жүніс
