5547 әскери бөлімінде жас сарбаздарға салтанатты түрде қару тапсырылды
Бүгін ҚР Ұлттық ұланының 5547 әскери бөлімінде 1-2026 шақырылымының жас толықтырушыларына жеке қару-жарақты салтанатты түрде тапсыру рәсімі өтті.
Салтанатты жиын әскери бөлімнің Жауынгерлік Туын алаңға алып шығумен және Қазақстан Республикасының Мемлекеттік әнұранын асқақтата орындаумен басталды. Жеке құрам алдында қару бекіту туралы ресми бұйрық оқылып, әрбір жас жауынгерге Отанды қорғаудың айбынды құралы — өзіне тиесілі қару-жарағы табысталды.
Қару тапсыру рәсімінен кейін бөлім командирі, подполковник Ж. Беркенов жас сарбаздарға арнау сөз сөйлеп, бұл күннің әскери өмірдегі орны бөлек екенін атап өтті. Ол жас жауынгерлерді ел тыныштығын, мемлекет қауіпсіздігін сенімді қорғауға және әскери антқа адал болуға шақырды.
Шара соңында жас сарбаздар саптағы темірдей тәртібін көрсетіп, салтанатты маршпен жүріп өтті. Бұл маңызды күн жас толықтырушылардың әскери рухын көтеріп, ел мен жер алдындағы жауапкершілігін тереңдеткен тарихи сәт болды.
