23 ТАМЫЗ – ҚАЗАҚСТАН РЕСПУБЛИКАСЫНДА ҚҰРЫЛТАЙ САЙЛАУЫ ӨТЕДІ

2026 жылғы 23 тамызда еліміз үшін тарихи маңызы зор саяси науқан – Қазақстан Республикасы Құрылтайының депутаттарын сайлау өтеді. Бұл сайлау – Жаңа Қазақстанды қалыптастыру жолындағы саяси реформалардың заңды жалғасы әрі азаматтардың мемлекеттік басқару ісіне қатысу мүмкіндігін кеңейтетін маңызды қадам.

Құрылтай – елдің стратегиялық даму бағыттарын айқындауға, қоғамдағы өзекті мәселелерді талқылауға және маңызды шешімдерді қабылдауға қатысатын өкілді институт. Сондықтан Құрылтай депутаттарын сайлау – әрбір азаматтың ел болашағына қатысты таңдау жасауына мүмкіндік беретін жауапты саяси науқан.

Қазақстан Республикасының әрбір азаматы өз таңдауын жасап, мемлекетіміздің одан әрі дамуына үлес қоса алады. Сайлауға қатысу – тек конституциялық құқық қана емес, ел алдындағы азаматтық жауапкершіліктің де айқын көрінісі.

Әділ әрі ашық сайлау – демократиялық қоғамның басты қағидаттарының бірі. Сондықтан сайлау үдерісінің заң талаптарына сәйкес ұйымдастырылуы мен әрбір азаматтың еркін таңдау жасауына жағдай жасалуы – басты міндеттердің бірі.

Құрметті жерлестер!

Еліміздің ертеңі мен болашағына бейжай қарамай, 23 тамыз күні өтетін Құрылтай сайлауына белсенді қатысуға шақырамыз. Әрбір дауыс – елдің келешегі үшін маңызды. Бірлігіміз бен азаматтық белсенділігіміз Қазақстанның тұрақты дамуы мен өркендеуіне негіз болады.

23 тамызда сайлау учаскесіне келіп, өз таңдауыңызды жасаңыз!