Әуежайдан қандай лауазымды тұлғалар тексеріссіз өте алады?

Еліміздің әуежайларында тексеруден босатылатын және арнайы VIP-залдарды пайдаланатын тұлғалардың тізімі жаңартылды. Премьер-министр Олжас Бектенов қол қойған Үкімет қаулысы 17 шілдеден бастап күшіне енді, деп хабарлайды Egemen.kz.

Жаңа ережеге сәйкес, вице-президент алғаш рет тексеріп-қараудан босатылатын лауазымды тұлғалардың қатарына енгізілді. Сонымен қатар ол арнайы қызмет көрсетілетін VIP-залдарды да пайдалана алады.

Тізімге Құрылтай төрағасы мен Қазақстан Халық Кеңесінің төрағасы енген.

Бұдан бөлек, арнайы VIP-залдарды пайдалану құқығы бар тұлғалардың қатарына Президент, Премьер-министр, облыстар және республикалық маңызы бар қалалардың әкімдері, Құрылтай комитеттерінің төрағалары мен депутаттары, Конституциялық сот аппаратының басшылары, сондай-ақ басқа да жоғары лауазымды тұлғалар басқаратын ресми делегация мүшелері кіреді.

Еске сала кетейік, елімізде Құрылтай депутаттарына кәсіпкерлікпен айналысуға немесе ғылыми, педагогикалық және шығармашылық қызметтен басқа ақылы қызмет атқаруға тыйым салынады.