«ҚАРАСОРА-2026»: ЕСІРТКІ ҚЫЛМЫСЫНА ҚАРСЫ КҮРЕС КҮШЕЙТІЛДІ
«Заң мен тәртіп» қағидаты аясында өңірде есірткі қылмысының алдын алу және жолын кесу бағытындағы жұмыстар жүйелі түрде жүргізілуде. 1 маусымы мен 31 қазаны аралығында республика көлемінде ұйымдастырылып жатқан «Қарасора-2026» арнайы жедел-профилактикалық іс-шарасы өтіп жатыр. Бұл туралы Өңірлік коммуникациялар қызметінің ақпарат алаңында өткен баспасөз конференциясында белгілі болды. Облыстық ПД Есірткі қылмысына қарсы күрес басқармасының бастығы Біржан Багисовтың айтуынша, іс-шара басталғалы өңірде есірткіге қатысты 38 құқық бұзушылық анықталған.
– Есірткі қылмысына қарсы күрес департамент басшылығының тұрақты бақылауында. Заңсыз айналымның жолын кесу бағытындағы жұмыстар алдағы уақытта да жалғасады. Қазіргі таңда облыс аумағында 5 мобильді бекет жұмыс істейді. Жалпы саны 102 қызметкер, 7 қызметтік іздестіру иті және 28 автокөлік техникасы жұмылдырылған. Сондай-ақ, әуеден бақылау және қызметтік иттерді пайдалану арқылы есірткі қылмыстарын анықтау шаралары күшейтілген , – деді Біржан Бағисов.
Айта кету керек, «Қарасора-2026» республикалық жедел-профилактикалық іс-шарасы қазан айының соңына дейін жалғасады. Оның негізгі мақсаты – есірткі құралдарының заңсыз айналымына тосқауыл қою, құрамында есірткісі бар өсімдіктерді заңсыз өсіру фактілерін анықтау және тұрғындар арасында құқықтық тәртіпті нығайту.
Қызылорда облысының Өңірлік коммуникациялар қызметі
