КӨГІЛДІР ОТЫН – АУЫЛДЫҢ ЖАҢА ТЫНЫСЫ

Биыл осы игіліктің нақты бір көрінісі – Дүр Оңғар ауылына газ желісінің толықтай тартылуы болды. Жобаның іске қосылу рәсімі облыс әкімінің қатысуымен өтіп, ауыл халқы үшін ерекше қуанышты оқиға ретінде есте қалды. Ұзақ жыл бойы көмір жағып, күл шығарып, қысқы суықта үйді жылыту үшін көп тер төккен тұрғындар үшін газдың келуі – уақытпен, еңбекпен, денсаулықпен өлшенетін нағыз жеңілдік.

Ауылда ең алғашқылардың бірі болып көгілдір отынның игілігін көрген – көпбалалы ана, ауылдың қадірлі тұрғындарының бірі – Зағира Алпуанова. Біз де осы қуанышты оқиғамен танысып, жаңа кірген газдың жылуын өз көзімізбен көріп, жағдайын білуге оның шаңырағына арнайы атбасын тіредік.

Зағира апай өмір бойы еңбекпен шыңдалған, ауылдың берекесін арттыруға үлес қосқан жан. Ол Кеңес уақытында ауылдағы шаруашылықтың түрлі салаларында қызмет еткенін ерекше ықыласпен еске алады.

– Кеңес кезінде жұмыстың түрін таңдау деген болмады. Шаруашылық меңгерушісі де болдым, балабақшада да істедім, мал шаруашылығына да көмектестім, қой да бақтым. Қырық бес жасқа дейін бала тәрбиелеп жүріп те еңбектен қол үзбедім, – дейді ол.

Шынында, ауыл адамдарының барлығы танитын, сыйлайтын Зағира апайдың еңбек жолы тұтас бір буынның өмір жолын айғақтайтын тәрізді. Бүгінде сол еңбектің зейнетін көріп отырған кезеңінде ауылға газдың келуі оның өмірін одан әрі жеңілдеткен. Үйге кірген газдың жайлылығын Зағира апай ерекше қуанышпен жеткізді.

– Осыған дейін отын жарып, көмір жаққаннан үйіміз бір ысып, бір суыитын. Таңертең тұрғанда үй салқын тартып тұратын. Ал қазір үйіміз бірқалыпты жылы. Пеш жақпайсың, күл шығармайсың. Бір сөзбен айтқанда, тірлік жеңілдеп қалды, – дейді көпбалалы ана.

Шынында да, ауыл тұрғындары үшін газдың келуі – уақыт үнемдеудің, денсаулықты сақтаудың, тұрмысты жеңілдетудің ең тиімді жолы. Оның үстіне, экологиялық тұрғыдан да көгілдір отынның пайдасы зор. Бұрын әр қыста бір үйге бірнеше тонна көмір қажет болса, енді ол шығын азайып, тұрмыс сапасы артып отыр.

Зағира апай сөз арасында ауылға газ жүргізу ісіне ұйытқы болған азаматтарға шын жүректен алғысын жеткізді.

– Ауданға газ келгенде біздің ауылға да жетер ме екен деп қызыға қарадық. Сөйтіп жүргенде көп күттірмей ол күнге де жеттік. Облыс, аудан басшыларына, елдегі жанашыр азаматтарға үлкен рахмет. Қызметтеріне абырой тілеймін, – деді ол.

Бұл алғыс – тек Зағира апайдың ғана емес, бүкіл ауыл халқының жүрек түкпіріндегі ризашылық. Себебі газ кіргізу – бір күндік емес, ұзақ уақытты, үлкен еңбекті, қаражатты талап ететін ауқымды жоба. Оны жүзеге асыруда билік те, мердігерлер де, ел қамын ойлаған азаматтар да бір мақсатқа жұмылған.

Енді Дүр Оңғардың тұрғындары үйді жылыту үшін көмір іздеп, күл шығарумен әбігерге түспейді. Газ қосылғаннан кейін ауылдың келбеті де, тұрғындардың көңіл күйі де өзгермек. Көгілдір отынның келуі – бір ғана ауылдың емес, бүкіл өңірдің өркендеуінің белгісі. Ауданның инфрақұрылымы жыл санап дамыса, халықтың тұрмыс деңгейі де арта береді. Дүр Оңғар ауылының бүгінгі қуанышы – ертеңгі күні басқа елді мекендерге де жұғысты болатын жақсылықтың нышаны.